Basketball World Cup Kum 13 hnuah Spain an champion

2019 FIBA Basketball World Cup Final chu Pathianni zan khan Beijing, China-ah khelh a ni a, Spain-in Argentina 95-75 a hnehin an champion. Phoenix Suns tana khel Spanish guard Ricky Rubio chu Most Valuable Player atan thlan a ni.

Basketball World Cup hi August 31 - September 15 chhung khan China-ah khelh a ni a, France-in Australia chu 67- 59 a hnehin pathumna an ni ve bawk.

Wukesong Arena-a final khelhah Spain-in quarter tinah point an hmu tam zawk vek a, harsatna nei loin Argentina hi 95-75 in an hneh. MVP atan a thlan Ricky Rubio chuan point 20 neiin freethrow vawi sarih a lut vek. Phoenix Suns guard Ricky Rubio hian rebound vawi sarih a nei bawk a, final-ah a langsar hle.

Spain an champion hnuhnung ber chu kum 2006 daih tawh kha a ni a, nomawi an chawi theihna kawngah Pau Gasol a ṭangkai hle. Tun ṭumah pawh hian Pau Gasol nau Marc Gasol chu player pawimawh a ni a, Toronto Raptors center hian final-ah point 14 bakah assists leh rebounds vawi sarih ve ve a nei a ni.

Kum 34 mi Marc Gasol hian Spain hi World Cup-a vawi hnih a champion pui tawh bakah Olympic-ah silver medal pahnih a lakpui tawh bawk.

Kum 2014 champion United States erawhin quarterfinal-ah France an hneh lo a, hemi hnu hian Serbia an hneh leh loh avangin tun inelnaah hian pasarihna an ni pha chauh.

World Cup hi kum 1950 aṭang khan khelh ṭan a ni a, United States hi an chet chhiat ber ṭum a ni. Chutihrualin US hi Olympics 2020 khel turin an tling tawh thung.