Ashes fifth Test-ah England chak, series 2-2 in a tawp

Kumin Ashes Test hnuhnung ber chu September 15 khan Oval-ah khelh zawh a ni a, England-in fifth Test-ah run 135-in Australia an hneh. Series-ah team pahnih hi 2-2 in inhnehtawk mah se Australia-in inelna hnuhnung bera hnehna an chan avangin 'Ashes urn' an kawl chhunzawm.

Cricket inelnaah Test match hi dah san ber a ni a, amaherawhchu ni nga tehmeuh khelh a nih avangin khelh hun rei lo zawk ODI leh T20 te hi a rawn ṭhang duang ta zawkah a ngaih theih. Chutiang karah chuan England leh Australia ten kum 1882 aṭanga an khelh ṭan tawh Ashes erawhin ngaihven a hlawh reng a, tun ṭuma Test match vawi nga an khelh pawh hi a hmuhnawm vek.

Australia hian kum 2001 hnu khan England-ah hnehna an chang lo a, tun ṭumah hian chak theihna hun ṭha an nei. Aussies-in fourth Test-a hnehna an chan chiah khan 'Ashes urn' an kawl chhunzawm dawn tih chiang mah se captain Tim Paine chuan England ram ngeia hnehna chan a duh thu a sawi.

Fifth Test-ah hian Paine hian vawm hmasak a thlang a, England-in run 294 an siam - Jos Buttler (70) leh Joe Root (57) te zarah run mawi hnai tak an siam. Australia bat hun a thleng a, Steve Smith bawk rawn che ṭhain run 80 zet a siam. Amaherawhchu England pacer Jofra Archer-a'n run 62 chauh pein wicket ruk a rawn la a, Aussies hi run 225-ah an thi vek.

Second innings-ah England tan Joe Denly chuan run 94 an siam a, Ben Stokes-a'n run 67 rawn belh ve bawkin run 329 an siam. England hian first innings nena an run zat belhkhawmin run 623 an chhawp sak a, Aussies tan target 399 an siam avangin chak turin an dinhmun a ṭha.

Australia hian ni hnih dawn hun a neih avangin fifth Test a ngaihnawm chho a, chutihrualin Aussies top order an che ṭha lo - Steve Smith pawh run 23 lekah an thi. England dinhmun a ṭha chho a, Australia tan Matthew Wade-a'n century (117) rawn siam mah se wicket li latu English bowler pahnih Stuart Broad leh Jack Leach te an langsar ta zawk. Ni ngana nghah thlen ngai loin ni linaah England-in hnehna an chang.

England captain Joe Root chuan, "Fourth Test-a kan chak loh avangin hun harsa tak kan paltlang a ngai a, kan tho chhuak thei hi a lawmawm. Kan khel ṭha tlangin ka hria," tiin fifth Test-a an chak avanga a lawm thu a sawi.

Australia captain Tim Paine chuan ,"Kan duh ber chu 'Ashes urn' a ni a, kan kawl leh dawn avangin kan lawm. Kan tan chuan draw a tawk. Chutihrualin fifth Test-ah chuan keini aiin an khel ṭha zawk a ni," tiin a sawi.

Kumin aṭangin World Test Championship ṭan a ni a, Test match result zir zelin point pek an ni a. Ashes Test aṭangin England leh Australia hian point 56 ve ve an hmu. Table-ah hian India chu pakhatna an ni mek a, Virat Kohli hote hian West Indies chu 2-0 in khualmualah an hneh a, point 120 an hmu.