King Carlo lalna ramah Liverpool
Champions League a hun leh ta - zanin dar 12:30 hian Napoli khelmualah champion lai Liverpool an lenglut dawn a, European football a hmuhnawm nghal dawn.
King Carlo tia hminglem an pek Carlo Ancelotti enkawlna hnuaia khel Napoli hian season hmasa khan Liverpool hi 1-0 in an lo hneh tawh a, an huphurh thut lo ang. Carlo Ancelotti hi Champions League nomawi vawi thum chawi tawh coach a nih avangin engtiklai mahin dah hniam theih a ni lo a, Jurgen Klopp hi coach ṭhangduang ber pawl a ni bawk.
Khawvela coach ṭha pahnih indona ang pawhin sawi theih a ni a, tu ruahmanna nge hlawhtling zawk dawn tih chu thil hriat châkawm a ni.
Nikumah chuan...
Season hmasa Champions League group stage-ah team pahnih an intawng a, mahni mualah 1-0 ve vein an chak - inkhel pahnih ena vannei zawk chu Liverpool an ni.
Team khelh dan hmuhnawm ber pawl Liverpool hi Napoli hian hmuhnawm lo takin an chhuah thei a, Ancelotti 'thluak' tih loh rual a ni lo. Carlo hian Klopp angin game rang leh attacking football ngawr ngawr a kalpui lo a, a player-te theihna leh khelh thiam dan milin a rem mai ṭhin.
Nikuma an intawn hmasak ṭum kha chuan Reds-in wing back an chhawr ṭangkai tih hriain 3-4-3 formation a hmang a, Dries Mertens leh Lorenzo Insigne ten Trent Alexander-Arnold leh Andy Robertson-te an nghaisa a ni ber!
Indona chu
Carlo hian 4-4-2 chu a formation duh ber a ni a, wing aṭanga goal nawr chu tlarhma lama an khelh dan a ni. Sarri-Ball bansanin defence, midfield leh attack 'balance' chu Italian coach thupui a ni.
Napoli ṭantute tana thu hriat nuam lo tur erawh Dries Mertens nena tlarhmaa inkawp ṭhin Arkadiusz Milik chu hliam vangin a inlan theih a la rinawm lo a, Lorenzo Insigne leh Fernando Llorente an la awm tho tih hriat tel erawh a ṭha.
Liverpool erawh dan pangngaiin attacking football nen an rawn thawk chhuak leh ang tih a chiang a, Roberto Firmino, Sadio Mane leh Mohammed Salah inkawp leh tur hi Napoli tlarhnung tan chuan mang ti ang tham a ni.
Reds hian goalkeeper Alisson chu an la chhawr thei dawn lo a, midfielder Naby Keita pawh a inlan thei lo ang - an tel loin Reds an buai rih lo.
Dressing room
Napoli-in an dressing room an chei ṭha mek a, Liverpool lakah an peih hman dawn lo niin a lang - Ancelotti chuan na takin a lo sawisel tawh.
Mahse, Klopp chuan, "Inchei ka mamawh chuang lo a, pawi tihna ka nei lo. Inneihna leh mitthi vuinaa hak tur suit ka nei a, a bakah ka ha ngai lo. "Champions League-a team ka kaihhruai hmasak berin hak ngei ngei tur emaw ka tih avangin ka ha tawh! Ka lan ṭhat lam ai chuan khelmualah ka naute an chet ṭhat a pawimawh zawk," a ti.
European champion hian Premier League match nga an khelh tawhah hnehna an la chang vek a, an result ṭha hi European football-ah chhawm tel an tum ang.
Team inṬhen dan
Group A : Paris Saint-Germain, Real Madrid, Club Brugge & Galatasaray
Group B : Bayern Munich, Tottenham Hotspur, Olympiakos & Red Star Belgrade
Group C : Manchester City, Shakhtar Donetsk, Dinamo Zagreb & Atalanta
Group D : Juventus, Atlético Madrid, Bayer Leverkusen & Lokomotiv Moscow
Group E : Liverpool, Napoli, Red Bull Salzburg & Genk
Group F : Barcelona, Borussia Dortmund, Inter Milan & Slavia Prague
Group G : Zenit Saint Petersburg, Benfica, Lyon & RB Leipzig
Group H : Chelsea, Ajax, Valencia & Lille
Zanin Inkhel Tur
Lyon 10:25 PM Zenit
Inter Milan 10:25 PM Slavia Prague
Chelsea 12:30 AM Valencia
Ajax 12:30 AM Lille
Benfica 12:30 AM RB Leipzig
Borussia Dortmund 12:30 AM Barcelona
Napoli 12:30 AM Liverpool
Salzburg 12:30 AM Genk
September 18, Nilaini Zan
Club Brugge 10:25 PM Galatasaray
Olympiakos Piraeus 10:25 PM Tottenham Hotspur
PSG 12:30 AM Real Madrid
Bayern Munich 12:30 AM Red Star Belgrade
Shakhtar Donetsk 12:30 AM Manchester City
Dinamo Zagreb 12:30 AM Atalanta
Atletico Madrid 12:30 AM Juventus
Bayer Leverkusen 12:30 AM Lokomotiv Moscow