Guardiola naute Shakhtar mualah zin chhuak

Manchester City chuan zanin dar 12:30 hian Champions League group match khel turin Shakhtar Donetsk an hmachhawn dawn a, Pep Guardiola nauten khualmualah point thum hmuh an tum ang.

Season hmasa finalist Tottenham Hotspur pawh dar 10:20 hian Olympiakos mualah an lenglut dawn. Spurs awmna group B inkhel dangah German champion Bayern Munich leh Red Star Belgrade te an inhmachhawn dawn bawk.

Tun dinhmunah chuan Pep Guardiola aia manager ṭha zawng dawn ila hming lamrik tur an vang hle ang. Spanish manager hi English football a luhchilh hnuah hun rei lote chhungin roreltu a ni a, season hnuhnung pahnihah an champion.

Mahse, manager ṭha tak Pep hi a famkim bik lo. Amah sawiseltuten an sawi ṭhin chu, "Lionel Messi awmna Barcelona tel lo chuan UCL-ah a hlawhtling thei bik lo" tih leh "Team dang khelh dan a zir chiang tawk ṭhin lo" tih a ni, a dikna chen a awm.

Bayern Munich a enkawl laiin Bundesliga roreltu an ni a, Etihad Stadium-a pan hnuah pawh Premier League-ah roreltu ni thei a. Amaherawhchu, European football-ah erawh champion chu sawi loh final pawh a la lut leh lo. A player duhzawng a la khawm a, a duh anga khelhtir turin hun a nei tam tawh bawk. Kuminah champion an tum ang.

Sergio Aguero khelh ṭhat vanglai a ni a, tlarhma lamah chuan Man City hi an ngaihtuah awm loh. Argentine striker bakah hian Brazil international Gabriel Jesus an la nei tel bawk. Tun dinhmuna an buaina chu hmatawng ni loin tlarhnung pawp hi a ni.

Season hmasa aṭanga chhawr rim Aymeric Laporte chu hliam vangin a inkhel thei lo mek. An match hnuhnung berah Nicolas Otamendi leh John Stones te an inkawp a, a sirah Kyle Walker leh Oleksandr Zinchenko te an awm - anni hi Norwich City lakah an nghing a, goal thum ngawt an chhuah.

Benjamin Mendy hliam a dam tawh a, France international hi Pep-a duhzawng ni mah se minute 90 chhung khelhtir ngam a la ni lo ang. Guardiola-a'n tlarhnung siksawi a duh a nih chuan Joao Cancelo pawh a la awm, anni pui tur hian tawnhriat ngah Brazilian midfielder Fernandinho a la awm bawk.

Tottenham-in an match hnuhnung berah Crystal Palace 4-0 in an sawp. Mauricio Pochettino naute boruak a ṭha chho hle a, mahse Argentine manager hian UCL khel tur chuan player a siksawi tur thu a lo sawi lawk tawh.

Hliam dam hlim Dele Alli leh Eric Dier te tan khelhna hun a inhawn a rinawm a, defender Kyle Walker-Peters pawhin a hmun ngai a luah leh theih tawh a rinawm bawk. Poch chuan, "Palace nena kan inkhelh aṭanga chhiar ṭan khan, ni 21 chhungin match sarih khelh tur kan nei dawn.

"Player naupang leh khel khat deuh tan pawh hun a awm ang, an tan hmun chan theihna kawng a inhawng dawn a ni," a ti. Hmun nghet chang duh tan khelmual chhunga chet dan hmanga manager tih lawm theihna hun a ni ang.