Saka leh Tierney an chiang lo

Arsenal manager Mikel Arteta chuan a player duh lai pahnih Bukayo Saka leh Kieran Tierney te chu inkhel turin an dinhmun a la chiang lo tih a sawi. Gunners hian Premier League khel turin zanin dar 11:30-ah Wolverhampton Wanderers an lenchilh ang.

North London club hi Manchester United nen goal awm loa inhnehtawk hlim an ni. United an hmachhawn ṭum hian Saka leh Tierney te chu hliam vangin an inlan thei lo a, player thar Martin Odegaard a inkhel nghal thei thung a ni.

Arteta chuan, "Saka leh Tierney ten training pangngai an la zawm lo, inkhel nghal tur chuan an tan a la harsa ang. Amaherawhchu an dinhmun hi ennawn leh a ni dawn, chumi hnuah a chiang chauh ang," tiin a sawi.

Captain Pierre-Emerick Aubameyang pawhin Wolves a hmachhawn theih a beiseiawm loh. Gabon international hi a nu damlohna vangin tun hnaiah a chawl a, manager Arteta chuan Auba tan a la hma lutukin a rinawm niin a sawi bawk.

Auba a awm loh chuan tlarhmaah Alexandre Lacazette chu rinrawl a ni leh dawn. French striker hian Man United lakah hliam tenau a nei a, a dinhmun endik a nih hnuah a dam ṭha thung - zaninah inkhel turin a inlan thei ang.

Wolves lamin an striker chhuanvawr Raul Jimenez chu an la chawr thei dawn lo. Mexican striker hi David Luiz nen ball an inchuhna lama inhliam kha a ni a, ani bakah hian Jonny, Rayan Ait-Nouri leh Marcal te an chawl mek a, Ruben Neves inlan lo tur pawh channa lian a ni ang.

Season bul ṭan fuh lo mah se Gunners an harh tawh. Tun hnai league match an khelh hnuhnung pariatah tlawm an nei lo, match sarih chu goal an chhuah lo hial. Amaherawhchu a bul an ṭan fuh lohna hliahkhuh tur chuan season tawp thlenga chet ṭhat a ngai tawh dawn.

Wolves pawhin nghelnghet takin an khel thei bik lo. Nuno Espirito Santo naute hian point 23 chauh an la nei a, tluk leh din fawma an kal avangin nikum lam an phak lo - European football khel leh tur chuan point thum hmuh zel a pawimawh tawh a ni.