Liverpool 'kim lo' an chak awlsam

Premier League champion lai Liverpool chu player dam kim loin London Stadium-ah an lenglut a, mualneitu West Ham 3-1 in an hneh.

Pathianni zan inkhelah Reds tan Mohamed Salah-a'n class takin goal hnih a khung a, Georginio Wijnaldum-a'n team goal hmangin chak nemnghehna goal a khung. Liverpool-in goal thum an khung hnuah Hammers-in Craig Dawson hmangin goal khat an khung ve hram.

Liverpool-in defender rinrawl Virgil van Dijk, Joe Gomez, Diogo Jota leh Naby Keita te hliam vangin an chhawr thei lo tih chu tlang hriat a ni tawh.

Reds vanduaina belhchhah turin Tottenham nen an inkhelh ṭumin Joel Matip leh Sadio Mane te an inhliam. Senegalese forward Mane hi hliam na ni lo mah se Hammers a hmachhawn thei lo.

Jurgen Klopp-a'n Brazilian forward Roberto Firmino a hahdamtir bawk nen Reds tlarhma hriat ṭhan pathum aṭangin Mohamed Salah chiahin bul a ṭan. Egyptian forward hi Divock Origi leh Xherdan Shaqiri ten an thlawp.

First half-ah West Ham tan Said Benrahma leh Michail Antonio ten chance nei ve bawk mah se Reds keeper Alisson Becker tan hna a harsa a awm lo. Reds goal nawr a na bik lo a, first half-ah goal hmuh tur a awm lo.

Second half-ah erawh Mohamed Salah thiamna thup theih a tawh lo a, minute 57-naah chance insiam chawpin goal kilah mawi zetin a hlai lut. Goal hnihna a la mawi zawk cheu, minute 68-naah Reds-in counter attack hmangin Hammers an chhu let.

West Ham corner pet chu Trent Alexander-Arnold-a'n chang fuhin mual sirah a vawrh a, Xherdan Shaqiri-a'n box chhungah vawrlut lehin Salah-a'n a ke dinglamin a la thla a, a ke dinglamin awlsam hmel takin a pet lut. 

Minute 84-naah subsitute pahnih Alex Oxlade-Chamberlain leh Roberto Firmino ten wall pass hmangin Hammers tlarhnung an ṭhiat a, Brazilian forward hian Georginio Wijnaldum pe lehin Dutch midfielder hian awlsam takin a khung.

West Ham-in minute 87-naah corner hmang ṭangkaiin Craig Dawson hmangin si phurh an sut ṭhen a, mualneituin goal an khung meuh hi chuan chak tur zawk a chiang tawh.

Liverpool boss Jurgen Klopp chuan, "First half-ah kan khel ṭha tawk lo a, halftime-ah kan siam rem a, second half-ah a hlawhtlinna kan hmu. Goal ropui tak pahtum kan hmu a ni," tiin an goal khung pathum a chhuang hle.

Reds boss chuan sawi chhunzawmin, "Team ṭha tak kan ni a, ka naute hian result ṭha kan neih loh chuan an hlim lo. Chutihrualin an rilru put hmang erawh engtik lai pawhin a dik," tiin a player-te a fak.

Liverpool-in match 21 khelh zawhah point 40 hmuin pathumnaah an awm mek a, Nilaini zanah Tottenham hnehtu Brighton an mikhual dawn. Jurgen Klopp-a hote hian Seagulls zawh hian Manchester City leh Leicester City an hmachhawn zui dawn a, nomawi humhim turin an khelh hmabak pathum hi a pawimawh khawp ang.