Saints hmaah Man United fiahna

Manchester United-in match hnih a zawna chak hmel an hmuh loh avangin Premier League table chung ber aṭangin an tla thla a, nomawi chawi tura mipui rinna an hloh tel bawk. Zanin dar 1:45 hian Man United-in Old Trafford-ah Southampton an mikhual dawn a, dinhmun siam ṭhatna hun ṭha a ni ang.

Ole Gunnar Solskjaer-a hote ang thoin Saints pawh insiamṭhat an mamawh. Ralph Hasenhuttl hote hian Arsenal leh Aston Villa an ngam loh zawn avangin table-ah pawh 11-naah an tla thla.

November thlaa Man United leh Saints inkhelh ṭum kha Edinson Cavani-a'n English club tan hming a chherna hmasa tihin a sawi theih. St Mary's Stadium-ah Saints-in goal hnihin hma an hruai a, second half-a Cavani rawn lutin engkim a ti dang. Uruguayan forward hian goal hnih leh assist vawi khat nen United a chakpui.

Kum 33 mi Cavani  hi Arsenal nen an inhnehtawk ṭumin bul a ṭan a, Inrinni zanah Everton an mikhual lehnghal dawn avangin Norwegian manager Solskjaer hian Anthony Martial a thlang zawk a nih pawhin a mak hran lo ang.

Solskjaer-a hoten champion nomawi an sawi ri hman a, tunah erawh Manchester City an kal fawr avangin nomawi sawi rik thawm a reh ta deuh. Chutihrualin season ṭantirh laia nomawi beisei hman Chelsea-in an manager Frank Lampard an ban tawh a, Tottenham pawh manager Jose Mourinho hoin an talbuai mek.

Norwegian manager Solskjaer hian Lampard leh Mourinho hnung a zui dawn nge Pep Guardiola leh Jurgen Klopp te nen nomawi an inchuh chhunzawm dawn tih chu zanin result aṭangin a teh theih ang. Hliam vangin Scott McTominay inlan lo thei dinhmunah a ding a, player dang erawh an dam ṭha. 

United ṭantute hmuh châk tur chu Liverpool Under 23 lama goal hnih khungtu Amad Diallo a ni a, Atalanta aṭanga an lakluh Ivorian winger hi bench-a awm ve tura ngaih a ni.