Kerala lakah Bagan an comeback

Pathianni zan Indian Super League inkhel hmuhnawm takah Kerala Blasters-in ATK Mohun Bagan lakah goal hnih khung hmasa mah se Kolkata club-in goal thumin an chhanglet. 

Fatorda Stadium-a inkhelah Bagan-in 3-2 a hnehna an chan avangin point 27 an hmu a, pahnihna dinhmun an sawhnghet. Inkhel dangah Hyderabad-in Chennaiyin 2-0 in an hneh.

Zanin hian Tilak Maidan-a I League hun lai aṭanga inhmachhawn tawh ṭhin Bengaluru FC leh East Bengal te an inhmachhawn dawn. Sunil Chhetri telna Bengaluru hian match hnuhnung pariatah chak an nei tawh lo a, Kolkata club nen an inhmachhawn hnuhnun berah 1-0 in an chak lo bawk.

Fatorda Stadium-ah inkhel hmuhnawm bik chhawp chhuah a ni a, table hnuai lama awm Kerala Blasters-in pahnihna Mohun Bagan an ngam hle. Kerala team hian inkhel an thunun ringawt lo a, goal chance pawh an insiam nasa. 

Bagan defender Tiri tihsual vangin Kerala-in chance ṭha an nei a, Kerala player pahnih Jordan Murray leh Sahal Abdul Samad ten ball an inpek kual hnuah Gary Hooper an pass a, Celtic striker hlui goal khung tur hi Sandesh Jhingan-a'n a dang hman hram.

Minute 14-naah goal ropui bik hmuhin a awm a, Hooper-a'n box pawn daih aṭangin Sandeep Singh aṭanga a ball hmuh chu a awm hmanga la thlain goal kilah a volley lut. Bagan keeper Arindam Bhattacharja-a'n goalline a rawn chhuahsan nen dan ngaihna a awm lo. First half-ah goal a luh belh lo a, second half-ah Kerala bawkin an khung hmasa.

Kerala tana Sahal Abdul Samad-a cross luh chu Rahul KP-a'n a khawih kawi a, box chhung buai deuh nuaih karah Costa Nhamoinescu-a'n minute 51-naah a khung. Amaehrawhchu Bagan an beidawng bik lo a, Odisha FC aṭa nga loan hmanga an hawh Marcelino hmangin minute 59-naah siphurh an sut. Brazilian striker hi Flamengo aṭanga inzir chhuak a ni a, a career tir lamah Europe club lianah inham tang thei lo mah se ISL khel tur chuan a la ṭha tawk tih a pholang.

Bagan an vannei zui a, Jessel Carneiro handball vanga an penalty hmuh chu Roy Krishna-a'n minute 65-naah siphurh sut nan a hmang. ISL bikah Roy Krishna-a chanchin sawi nawn a ṭul tawh a, Fijian forward ṭha mi hian minute 87-naah tawih zetin chakna goal a khung zui bawk.

Lallianzuala Chhangte khelhna Chennaiyin FC-in tun hnaiah result ṭha an hlawh chhuak thei meuh lo. Tilak Maidan-a inkhelah Chennaiyin hian Hyderabad lakah ball chang tam zawk mah se goal an khung thei lo a, Hyderabad erawh goal zawna an pet pahnih a luh ve ve avangin 2-0 in hnehna an chang. 

Hyderabad tan hian Francisco Sandaza leh Joel Chianese ten hun chanve hmalam leh hnung lamah goal an khung ve ve a, point 22 hmuin table-ah pathumnaah an inhlangchho a ni.