Barca tana goal 650 khungtu Messi Hmahruaitu chu Atletico Madrid

Lionel Messi-a'n Barcelon tana a goal 650-na chu freekick aṭangin mawi takin a khung. Catalan club hian an mikhual Athletic Bilbao chu 2-1 a hnehin La Liga champion an la beisei zel, pahnihna dinhmun an luah.

Pathianni zan inkhel dangah Atletico Madrid chuan Luis Suarez goal hnih hmangin Cadiz 4-2 in an hneh a, league match 19 khelh aṭanga point 50 hmuin a chung berah an awm. Match khata khel tlem chungin Barcelona aiin point 10 zetin an sang zawk.

Messi-a'n ball a pek chhuah hnuah ṭul lo taka tih tluk a ni a, box pawnah freekick a hlawh chhuak. Athletic lamin player panga hmangin 'wall' an siam a, player pangate an zuan palh pawha a hnuai lama ball kal dang tur pakhat chu an hnungah a awm bawk.

Keeper in angle a khar loh lam veng tur hian player pakhat chu goal bulah a la ding cheu bawk. Heng zawng zawng awm karah hian Messi-a'n a duhna takah a chhuih lut a, club tan freekick vawi 49 a chhuih luh tlinna chiah a ni.

Mikhual Athletic lamin an nawr karah Jordi Alba chuan an mahni lamah a ti lut palh a, point khat ve ve in an insem mai dawn nia a lan hnuah Antoine Griezmann chuan Oscar Mingueza siamsak aṭangin chakna goal a khung.

Barcelona hian point 40 an hlawhchhuak ta a, an hmelma leh elpui Real Madrid nen an point inzat mah se goal difference an neih ṭhat zawk vangin pahnihnaah an awm, champion lai Real hi an match hnuhnung berah an tlawm a ni.

Season bul ṭan fuh lo mah se Ronald Koeman-a naute an insiamṭha zel, tun hnai league match an khelh hnuhnung 10 aṭangin chak loh an nei lo - vawi riat hnehna changin ṭum hnih chu an khingpuite nen an inhnehtawk.

Barcelona-in hnawl mah se Suarez thiamna a la nep chuang lo. Uruguay international striker hian Cadiz lakah goal hnih a khung a, Atletico tan hian Suarez bakah Saul Niguez leh Koke ten goal khat ve ve neih belhin an chak nuamsa hle.

Kum 34 mi Suarez hi nikum nipui lai khan Barcelona chuan an chhuahtir a, an elpui Atletico a pan. La Liga season kal laiah match 16 aṭangin goal 14 a khung tawh a, ani aia khung hnem an awm lo - a kum tam deuh tawh mah se khelmual chhungah a la tar lo.

Diego Simeone naute hian 2014 hnua a vawi khat nan league match sarih chhung hnehna an chang zawn ta a, club lian zawk Barcelona leh Real Madrid aia khel tlem chunga an san fal theih avangin an champion a rinawm tawh hle.

Argentine manager Simeone chuan, "Football-ah chuan thil thlen dan a zira insiamrem thiam a pawimawh. Tunlaia kan khelh dan phung hi kan kalsan loh ka duh, rilru huaisen leh paukhauh tak chungin kan khel a, hei hian rah ṭha a chhuah.

"Hma kan hruai avangin nomawi sawi a la hun ngawt lo, match khelh hmabak pakhat zel kan ngaihtuah ang. Ka naute pawh boruak leng vela phur kual mai loin a tak rama kan thlen hma chuan inthlahdah lo turin ka duh," tiin a sawi.