Gasly-a'n hrileng a kai

Pierre Gasly chuan coronavirus a kai tih hmuhchhuah a ni a, Formula 1 driver zinga hrileng kai parukna chiah a ni. Car intlansiakna sang bera driver 30% ten hri an kai tawh tihna a ni.

Alpha Tauri driver chuan, "Khung hran ka ngai a, mahse in lamah ka theih anga nasain inbuatsaihna ka nei reng tho ang," a ti. Season hmasa Italian Grand Prix-ah khan Gasly hian hnehna a chang a, kuminah beisei a nei sang zual.

World champion Lewis Hamilton bakah Racing Point driver pahnih Sergio Perez leh Lance Stroll ten season hmasa laklawh laiin hri an kai a, hei vang hian intlansiak an hmachhawn thei lo tawh a ni.

Season chawlh lai khan McLaren driver Lando Norris leh Ferrari car khalhtu Charles Leclerc te pawhin hri hi an lo kai tawh a, inelna neih loh lai a nih avangin an harsatna tawh a ziaawm deuh.

Team thuneitu zingah Mercedes team principal Toto Wolff chu hri kai tharlam a ni, kumin January thla khan hri a kai tih an hre chhuak. Racing Point team neitu Lawrence Stroll, Williams team principal Simon Roberts leh Red Bull sporting director Jonathan Wheatley te pawhin harsatna hi an lo tawh tawh hlawm a ni.