Gattuso a lungawi lo

Napoli coach Gennaro Gattuso chuan an club president Aurelio De Laurentiis lakah a lungawi loh thu a sawi chhuak. Tun hnaiah result an neih ṭhat tawk loh avangin club chhunga neuh neuh awm chu a lang chhuak niin a ngaih theih.

Kar hmasa khan club thuneitu lam chuan an coach hi an thlawp tlat thu an sawi. Mahse, president hian media hmaah an coach hi a chet dana zirin ban theih a nih thu a lo sawi lang leh hnuhnawh a ni.

Pathianni zan khan Napoli hian Serie A an khel a, an khingpui Parma chu Elif Elmas leh Matteo Politano te goal hmangin 2-0 in an hneh, hnehna an chan hnuah Gattuso hi a ṭawng chhuak.

Gattuso chuan, "Tunlai chu kan chungchang hi media lamah a ṭha lo zawngin a tam hle. Vawi khat che sual zeuh ila, ban nghal mai tur angin ka chanchin a thang mawi lo vak zel, kan chet ṭhat lai erawhin fakna kan dawng ngai si lo.

"De Laurentiis nen hian inlaichinna ṭha tak kan nei, amaherawhchu tun hnai ni 15 chhung vela thil thlen dan hi chu hriatthiam a harsa hle. Thil ṭha lo zawng a thlen ṭhin zawng zawng hi tawp rawh se, a tawk e," tiin a sawi.

Season hmasa khan Gattuso kaihhruaina hnuaiah Napoli hian Coppa Italia nomawi an chawi a, kuminah erawh beisei leh duh angin season a hmang ṭha tawk lo. Player a nih laia rorum tak Gattuso hi a lungawi lo a nih chuan club tan buaina tham a tling ang.