Poch enkawl PSG an chak lo

Paris St-Germain chu an manager thar Mauricio Pochettino kaihhruaina hnuaiah a vawt khat nan an tlawm. Pathianni zan Ligue 1 inkhelah PSG hi table mawng lama talbuai lai Lorient mualah 3-2 in an tlawm a ni.

French champion tan Neymar-a'n goal hnih khung mah se a tawk zo lo a, mualneitu lamin Laurent Abergel, Yoane Wissa leh Terem Moffi te hmanga goal khat ṭheuh an neih avangin point thum hlu tak an hlawh chhuak.

Ligue 1 match 22 an khelh chinah PSG-in point 45 a nei a, pathumna dinhmun an luah. An chungah hian hmahruaitu Lille (48 points) leh Lyon (45) te an awm, an tan nomawi chu la humhim theih ni mah se hna a hautak chho dawn.

PSG manager Pochettino chuan, "A tir lam aiin inkhel chawhnu lamah kan khel ṭha zawk, chutiang chung chuan second half-ah goal hnih kan chhuah bawk si, a chang chuan vanduai ni a lo thleng ve ṭhin tih a la chiang.

"Tun ṭuma kan chak loh dan hi chu tihpalh thil a ni. Team nghet tak din tuma insiam thar mek kan ni a, chetsual ni lo thleng mah se hmalam panin kan kal zel ang," tiin a sawi.

Argentine manager tan club thuneitu lam ti lungawi tur chuan Ligue 1 nomawi chauh a tawk dawn lo, inelna lian Champions League nomawi lak a ngai dawn - Barcelona hneh thei tur team din a ngai dawn.