Tuchel hoin Chelsea an chak

Thomas Tuchel chuan Chelsea a enkawl hnua a chak ni hmel hmasa ber a tawng. Blues hian captain Cesar Azpilicueta leh defender Marcos Alonso te goal hmangin an mikhual Burnley chu 2-0 in an hneh.

Chelsea hian February 4, Ningani zanah Tottenham Hotspur an lenchilh zui dawn a, coach thar Tuchel naute tan Burnley hneh hi London Derby khel tura inbuatsaihna ṭha tak a ni ang.

Pathianni zan Stamford Bridge a inkhelah Callum Hudson-Odoi thawhrah sengtu Azpilicueta chuan chawlhlawk hmain goal hmahruai a khung a, second half-ah Christian Pulisic ball pek naran nia lang chu Alonso-a'n goal hnihna atan a chantir.

Tuchel hian London a pan hnua a match hmasa berah Wolves chu goal awm loin a inhnehtawk pui a, match hnihnaah goal chhuah loh in an chak - match hnih khelh china goal chhuah loh hi chanchin ṭha a ni ang.

Azpilicueta-a'n 2012 khan Marseille aṭangin Chelsea a zawm a, tuna Blues player zingah chuan a senior ber a ni - a kum lehah Alonso chu Fiorentina aṭangin an lalut leh bawk.

Spanish defender pahnih hian London club tan ropuina an lo chang tawh ṭhin a, sulhnu ṭha an nei. Mahse, manager Frank Lampard awm lai khan duhsak an hlawh lo, khelhna hmun pawh an chang mumal lo.

German manager Tuchel a rawn lan hnuah a fawng chelhtu dinhmun an luah leh tawh, an tawnhriat neih chu player naupang zawk tan pawh a ṭangkai ngei ang tih a chiang, goal venhim bakah a nawr kawngah an thawhhlawk hle.

Goal an chhuah lo a, an mamawh zat an khung bawk avangin Chelsea tan lawmna tur a ni. Amaherawhchu striker Timo Werner-a'n league match 12 chhung goal a khung ta lo a, German player in a theihna tak a pho chhuah theih nan Tuchel a pawimawh dawn.

Chelsea manager Tuchel chuan, "Team tan a ṭangkai a, kawng hrang hrangin a theihtawp a chhuah, ṭangkai taka a khelh miau chuan keini lam chuan kan thlawp zel ang," tiin Werner chu goal khung lo mah se a pawimawh thu a sawi.

Premier League champion Liverpool chu Anfield-ah an hneh thei a, hei vang hian Burnley tan Stamford Bridge zawh hi thil huphuhawm leh chak theih lohna hmun a ni ngawt lo, beisei nei ngam chungin an lenglut.

Sean Dyche-a'n a naute a rem khawm phui ṭha a, chawlhlawk hman dawna goal khatna an chhuah hma kha chuan keeper Nick Pope pawhin hna harsa thawh tur a nei lo, hla tak aṭanga Werner pet a lo dansak chu a langsar a nimai.

Darkar khat an inkhelh hnuah an goal thun khawl Chris Wood chu hliam vanga lak chhuah a ngai a, goal phurh sut tur an neih lai a nih avangin Wood inhliam hi a pawi, an goal nawr a nat loh bakah inkhel a nghawng.

Hun tawp dawnah James Tarkowski-a'n goal khung theihna hun ṭha a nei hram a, mahse Chelsea goalkeeper Edouard Mendy tan hna hautak a tling phak lo. Reds leh Aston Villa an hneh ṭuma an vanneihna ang kha an nei nawn lo a ni.

Dyche-a naute hian season kal laiah goal khung an harsat. League match 20 khelh aṭangin goal 13 chiah an khung, match 11 zetah goal an nei lo. Goal li khungtu Woods an chan zui a, an player zinga goal khung hnem ber a awm loh zui avangin hna a harsa sawt ang

Chelsea manager Tuchel chuan, "Kan theihtawpin goal kan nawr a, fans lam beisei anga kan khung tam tawk lo kha a pawi. Amaherawhchu a bulṭhut aṭanga kan rem phui thei kha a lawmawm lai chu niin ka hria.

"Kan khingpui khan minute 94 chhungin goal hlauhawm an nei miah lo, khatianga khingpuite da chah theih kha football-ah chuan thil awlsam a ni lo," tiin an chakna hnar pakhat chu an tlarhnung phui a nih thu a sawi.

Burnley manager Dyche chuan, "Team ṭha zawkin hnehna an chang, keini lam chuan sawi buai theih kan nei lo. Second half-ah khan kan inkhelin hma a sawn hret a, mahse keini aiin kan khingpui an khel ṭha zual zel si.

"A chang chuan team lian leh ṭha zawk kan hneh a, tun ṭumah erawh kan vanneih ni a thleng ta lo," a ti. Table-ah 16-na an ni a, tla thei china awm Fulham nen an inthlauhna chu point riat a ni mek.