Kane tel lohna Spurs chak lo

Tottenham Hotspur chu Pathianni zan Premier League inkhelah Brighton & Hove Albion lakah 1-0 in an tlawm. Inkhelh banah Brighton manager Graham Potter chuan tun hnai kum hnih chhunga a naute khelh ṭhat ber ṭum a nih thu a sawi.

Inkhel a goal awmchhun hi Leandro Trossard khung a ni. Trossard hian season ṭan ni khan Chelsea lakah a khung a, a goal hnihna khung turin a nghak rei hle. Spurs lakah hian Pascal Gross-a pass chu minute 17-naah point thum hmuh nan a khung.

Jose Mourinho-a'n hliam vangin Harry Kane a chhawr thei lo a, English striker ṭha awm loh karah Gareth Bale chuan tun season league match bika a vawi hnih nan inkhel bul a ṭan.

Real Madrid aṭanga an hawh Bale hian chawlhlawk hma deuhin goal khung theihna remchang nei mah se a tauh lut lo. Season duhawm hmangtu Son Heung-min pawhin nidang angin danglamna a thlen thei bik lo.

South Korea international Son leh Carlos Vinicius te khung tur chu Brighton keeper Robert Sanchez-a'n a lo dansak a, minute 90 chhung an goal an venhim theih avangin season kal laia a vawi khat nan an mualah Seagulls an chak.

Tottenham manager Mourinho chuan, "Kane a awm lo khan player dangte rilru nasa takin a nghawng tih a lang, phurna an neih loh bakah an inrintawkna neih sa pawh an hloh nasa. Kan tuar ta chiang reng a ni.

"Harry Kane hmunruak luah khat zo an awm lo tih chiang takin ka sawi a, chumi chuan an rilru a siam ṭha thei si lo. Team talbuai leh nem zawk laka chak loh chu thil pawi tak a ni," tiin an striker Kane awm lo an tawrh nasat thu a sawi.

Brighton manager Potter chuan, "A tir aṭanga a tawp thlengin kan khel ṭha em em vek. Goal kan venghim ṭha a, goal ṭha tak kan khung bawk, khelmual chhunga ka naute rilru put dan khan min ti lawm," a ti.