A eng lam thlir zeltu Nadal

Australian Open khel tur player an khunghran avangin mi tam takin an sawisel a, hetih lai hian world number 2 Rafael Nadal erawh a phun nawi lo - hun harsa karah tennis an khel thei tur chuan a tih lawm zawk thu a sawi.

Player leh coaching staff zawng zawngte chu Melbourne khawpui an thlen hnuah ni 14 khunghran an ni a, hrileng vanga an him tlan zawkna tura tih a ni. Player tam zawkin khunghran hun an hmang zo tawh a, training pangngai an nei thei leh tawh.

Nadal chuan, "He hmunah hian khunghran kan nih tur hre sain kan zin lut a, a nuam lo leh hrehawm lai deuh chu a awm a ni mai thei. Chutihrualin hri leng vangin khawvel pum a buai a ni tih kan hriat nawn a ngai ang.

"Tunah chuan training pawh kan nei thei tawh a, rilru hahna leh thil harsatna lam ai chuan tennis kan khelh theih leh tak avanga lawmthu sawina hun a ni tawh zawkin ka hria," tiin a sawi.

Season hmasa khan Nadal hian Grand Slam nomawi 20-na ni turin French Open title a la, major title lak hnem lamah Roger Federer nen an intluk mek. Swiss star hi Australian Open-ah a inlan thei lo a, Nadal tan record thar siam theihna hun a ni ang.

Spanish tlangval Nadal-a'n Australian Open inbuatsaih nan ATP Cup a khel dawn. Ram leh ram tennis team hmanga inelnaah hian a match hmasa ber atan Nilaini chawhnu lam hian Greek tlangval Stefanos Tsitsipas nen an inhmachhawn dawn.

ATP Cup-ah hian champion lai Serbia chu world number 1 Novak Djokovic hoin an inlan dawn a, US Open champion Dominic Thiem pawh Austria aiawhin a inlan ang - player langsar an tel tam avangin ngaihven a hlawh ang.