Djokovic dinhmun a chiang lo

Novak Djokovic hliam a la dam thei lo a, Serbian tlangval hian tennis court chhunga a rawn kir hun tur la sawi chiang thei lo mah se Japan khawpui Tokyo-ah chuan inlan theih a beisei.

World number 1 Djokovic hi US Open khelh zawh takah khan a dar (shoulder) a hliam, beisei angin a khel chhuak thei lo. New York khawpuia inelna lianah Stan Wawrinka hneh loin last 16-ah a zinkawng a tawp.

Grand Slam vawi 16 champion tawh Djokovic chuan, "Kan rawn kir hun tur hi sawi theih ka chak ngei mai, mahse tunah chuan ka hma hun hi ka hre thei rih lo a ni. Nitin hian ka hliam dinhmun endik a ni a, zawi muang chuan ka dam zel.

"September 30 aṭanga khelh tur Japan Open Tennis Championships chu rilruah a awm, amaherawhchu hei pawh hi a la chiang chuang lo," a ti. Asia khawmualpuiah tennis inelna an ṭan dawn a, hard court hi Djokovic inkhelh thiamna hmun a ni.

Tun season-ah Djokovic-a'n Grand Slam nomawi pahnih a chawi a, a pumpuiah major title 16 a nei tawh. A chungah hian Roger Federer (20 titles) leh Rafael Nadal (19) te an la awm.