MPL awm tawha team intluk tawk ber ṭum?

Mizoram Premier League Season 8 chu September 5 khan khelh ṭan a ni a, match riat awm tawhah match liah chak zawk an awm loh avangin kumin hi team intluk tawk ber ṭuma ngaih theih a ni.

MPL ṭan hmain MFA Super Cup leh I Day Football a awm a, inelna pahnih aṭangin team ṭha fal an awm lo tih a lang nghal. Super Cup-ah Mizoram Police-in final-ah Chanmari FC hnehin an champion a, player ṭha sa an nih bawk avangin thilmak a ni lo.

Amaherawhchu I Day Football-ah Mizoram Police leh Chanmari hian group stage an paltlang lo. MPL champion lai Aizawl FC bakah season hnuhnung pahnih inelna paruka vawi nga champion thei Chhinga Veng te tawpna pawh semifinal a ni a, Electric Vengin final-ah FC Venghnuai an hneh.

Inelna pahnih aṭanga thlirin Police, Electric Veng, Chanmari, Chhingcows, Aizawl FC leh MPL kaithar Venghnuai te chu semifinal lut thei tura ngaihte an ni. Hmun ruak pali team parukin an inchuh tur hi a ngaihnawm nghal.

Round hmasa berah team nem tura ngaih Chawnpui FC leh Ramhlun North ten Police leh Chanmari te an hneh lo nghal. Amaherawhchu Chawnpui leh Ramhlun North te hi Centralized Registration System tuar ber an ni a, squad kim loa an khel chungin team ṭha zawka ngaih an el tawk. 

Ramhlun North hian round 2-ah Chawnpui hi an hneh zui avangin point thum an hmu der tawh a, team dinhmun thlir phei chuan pathumnaah an awm. Tuna an point thum hmuh hian Ramhlun North hi a fuih phur fuh chuan semifinal lut thei zingah an tel chho thei ang. Chawnpui erawh match hnihah point an hmuh loh avangin insiamṭhat ran an mamawh hle.

Team ṭha paruk zinga pali Electric Veng, Venghnuai, Aizawl FC leh Chhinga Veng te round hmasa pahnihah an intum kual tiin a sawi theih a, chak an awm loh ang thoin chak lo pawh an awm lo. Academy player ring nasa Aizawl FC an lian bik lo a, player ṭhain chhuahsan tam mah se Chhinga Veng an la te lo, chutihrualin MPL7-a final-a inhmachhawn te hi MPL8 final-ah an intum nawn a rinawm ta rih loh.

Electric Vengin coach thar Lalsangzuala Hmar hnuaiah hma an sawn chungin MPL8-ah point thum an la hmu lo a, squad ṭha ber an neih bik loh avangin semifinal ticket kawl sa anga chhiar theih an ni lo. FC Venghnuaiin CRS an ṭhatpui a, MPL top scorer ni tawh Laldampuia leh player ṭha dang an lakbelh avangin MPL kaithar hi zuam chi an ni ta lo. Coach Lalrindika Hmar hote hian mipui puihna nen semifinal an beisei ngam ang.

Mizoram Police erawh MPL season hmasa ber hnua champion rinkai ber an nih vawi khatna a ni a, coach Lalbiaksanga Colney-in pressure a ngah ang. Tun dinhmunah erawh Police-in match hnihah hnehna an chang ve ve a, hei aia bul ṭan ṭha a awm lo. S. Malsawmtluanga kaihhruai Chanmari FC hi hriatthiam an la har hle.

MPL6 champion hian match hmasa berah Ramhlun North 3-1 in hneh mah se goal chance an insiam tam tawk lo a, Police lakah goal hnih an khung chungin point an hlawh chhuak lo. Chanmari hian player an lakkhawm hma avangin champion rinkai an ni hman a, match hnih khelh zawhah erawh semifinal an khel ta lo a nih pawhin thilmak a ni lo ang.