Villa leh West Ham inhnehtawk

Thawhṭanni zan Premier League inkhelah Aston Villa chu an mikhual West Ham nen goal lut loin an inhnehtawk a, kai thar Villa hian relegation zone an chhuahsan. Minute 23 chhung player 10-a khel Hammers tan point hmuh hi lawmna tur a ni bawk ang.

Villa Park-a inkhelah West Ham defender Arthur Masuaku chu minute 67-naah yellow card vawi hnihna hmuh vangin hnawhchhuah a ni a, inkhelh ban hnua sawi zui hlawh chu Villa player pahnih Anwar El Ghazi leh Tyrone Mings te inbakkaih a ni.

Premier League kai thar Villa-in West Ham an hlau bik lo a, player an incho tawk hle. Goal khung thuma inbeihna aiin team pahnih player incho taka an inbei lai hmuh tur a tam. Villa midfielder John McGinn chu hun ṭha neitu ni mah se Hammers keeper Lukasz Fabianski fakna mai a ni.

First half-a thil thleng langsar bera chhal ngam chu Villa player pahnih intibuai a ni! Mings chuan goal venhim kawngah El Ghazi chu a ṭhiante pui ṭha tawk loa ngaiin a hau. Netherlands winger El Ghazi a lawm lo, kal hnaiin Mings hmai chu a luin a va nawrsak.

Mings-a'n a duhtawk mai bik lo, an inkal hlat dawnin a kut zungchalin a teammate hi a kawk bawk. Mahse, he thil thleng chungchangah referee Mike Dean leh video assistant referee te chuan card phawrh ṭul an ti lem lo.

Hammers keeper Lukasz Fabianski-a'n ball kang lai hnek chhuah a tumna lamah El Ghazi a hnek fuh a, Sebastien Haller titlutu McGinn a inhliam bakah Angelo Ogbonna pawh enkawl ngai khawpin a intipalh bawk.

Yellow card panga phawrh zinga pahnih chu Masuaku hmuh a ni. Masuaku hian Frederic Guilbert chu enkawl lailawk ngai khawpin a hliam a, card hnuhnung zawk a hmuh dawna a tih tluk Ahmed Elmohamady erawh a tlu lui deuh niin a ngaih theih.

Player hnawhchhuah chungchangah West Ham manager Manuel Pellegrini a lawm lo. Pellegrini chuan, "Khatiang chu khualmuala inkhelh ṭuma thil thleng ve thei chauh a ni, fans lamin pressure an pe nasa a, foul apiangah khan nasa takin an lo au zel," tiin a sawi.

Hammers manager chuan sawi zawmin, "Player 10 kan nih hnuah pawh a kim ang thlapin kan la khel thei, a chhuak ta kha a ṭangkai lo tihna ni loin a chhuah hnuah a ṭhiante an ṭangin an thawkrim zual a ni. Match kan khelh zel turah pawh tum ṭuma kan rilru ang hi put zel ka duh," a ti.

Villa manager Dean Smith chuan, "Player 11 ve ve kan nih lai khan kan khel ṭha zawk, pakhata kan tam hnuah a ṭha lehzuala kan khelh theih ka ka beisei. Mahse, kan hmanhmawh lutuk niin ka hria, holam taka hun ṭha neih khawhral kan ngah.

"Season bul kan ṭan chho chauh a ni a, point thum hmu ta lo mah ila inkhel boruak sang taka point hmuh hi a chhe hran lo," a ti. Villa captain Jack Grealish pawhin a tam zawk ni chunga chakna goal an khung thei lo chu pawi a tih thu a sawi ve bawk.