Champions League a hmuhnawm dawn

European football ngainatute tan mit a tlai leh dawn - Paris Saint-Germain chuan zanin dar 12:30-ah Real Madrid an mikhual dawn a, sum ngah pahnih an intawng dawn. 

Real Madrid hi Champions League-a club hlawhtling ber an ni a, PSG erawh a vawi khat nana European champion nih tuma kum tin sum uchuak taka seng ṭhin an ni. Season hmasa Champions League last 16-a boruak lian bera chhal ngam chu Atletico Madrid leh Juventus inkhel kha a ni a, tun season-ah group khatah an awm ho. 

Zanin dar 12:30-ah vek team pahnih hi an intawng leh dawn a, an boruak a te dawn lo tih sawi ngam a ni - Atletico khelmualah an inkhel ang. 

Paris khawpuia inkhel turah PSG-in an duh angin squad an rem thei dawn lo a, French club ṭantute te an awm a nuam lo ang. 

PSG hian nikuma Manchester United an ngam loh ṭuma a ṭawng dan mawi lo tak avanga hrem Neymar an la chhawr thei dawn lo a, Edinson Cavani leh  Kylian Mbappe an la inhliam bawk. 

Player pathum thiamna leh theihna enin PSG-in an tuar dawn tih a chiang a, a harsa dawn - Julian Draxler, Thilo Kehrer leh Colin Dagba an la inhliam bawk a, PSG fans tan manganna tham a ni. 

Hriat tel atana ṭha erawh PSG hian Mauro Icardi an nei thar a, Italian striker hi Inter Milan tan match 219-a goal 124 khung thei a nih avangin a ngaihtuahawm lo - tun season match hniha goal thum khung tawh Eric Maxim Choupo-Moting an kawl tel bawk. 

PSG ṭantute tana thu hriat nuam tur chu Real Madrid hi an ṭhat dan berin an inlan thei dawn bik lo - player pasarih ngawt chu Paris-ah an inlan thei lo ang. 

Luka Modric, Isco, Federico Valverde leh Marco Asensio-te chu an league match hnuhnung bera Levante hmachhawn lo vek an ni a, club training an la zawm lo. Brazilian defender Marcelo chu Levante laka a hliam vangin a inlan theih a rinawm lo a, captain Sergio Ramos leh Nacho inhliam hi manganna tham a ni bawk. 

Mahse, Real hian tlarhmaah Gareth Bale leh Eden Hazard an inkawptir thei dawn a, PSG tlarhnung su hawng turin player pahnih hi an ṭha tawk. 

Season hmasa Champions League last 16-a Juve leh Atletico an intawn ṭumin match hmasa zawkah 2-0 in Atletico an chak a, coach Diego Simeone-a'n uchuak takin an chak a lawm. 

Second leg-ah Juventus-in thawnthu an her danglam a, a ziaktu chu Cristiano Ronaldo a ni - 3-0 in Juve an chak let a, Ronaldo goal khung vek a ni! Kum 34 mi forward hi Juve tan a la khel reng a, La Liga-a khelh lai aṭang tawha Atletico hmelma lian hi Simeone tan ven dan hriatchhuah a ngai tawh.

Ronaldo hian Real tan a khelh laiin Los Rojiblancos (Atletico sawina) lakah goal 22 ngawt a lo khung tawh a, 2014 Champions League final-a a khung kha a tel - Atletico a huphurh thar thut lo ang. 

Juventus-in Ronaldo an nei a, Atletico-in a hnampui Joao Felix an nei ve tho - pound maktaduai 100 chuang man forward hi Ronaldo nena khaikhin rual la ni lo mah se ram tana a khelhpui thlen chin thleng turin theihna a nei. 

Felix hian, "Keima thawnthu ziak turin ka lo kal a, Cristiano chu Cristiano a ni mai - keimah tawp nih ka duh," tiin Ronaldo nena khaikhin a nihna chu a lo chhang tawh a,  kum 19 mi forward tan zanin hi thawnthu ngaihnawm ziahna remchang a ni. 

Ronaldo-a'n Atletico sa huatah tak khawihin, "Champions League nomawi vawi nga ka chawi tawh a, he club hian pakhat pawh an la chawi lo," tiin Atletico chungchang a lo sawi tawh a, fan-ten an la na. 

Portuguese forward-in Juve a pan chhan ber nia an sawi chu European champion nihpui a ni a, a beiseina tihtawp sak turin Atletico player-ten 100% in an theihna an pe ang. 

Atletico-in league match hmasa pathuma hnehna an chan vek hnuin Real Sociedad chu 2-0 in an ngam lo a, he inkhelah hian hliam vangin goalkeeper Jan Oblak chu lakchhuah a ngai zui. 

He thu buatsaih a nih lai hian Alvaro Morata leh Thomas Partey dinhmun tihchian a la ni lo a, player pahnih hi hliam vangin Juve an hmachhawn loh a rinawm zawk. Juve tan lawm a kim bik lo. Douglas Costa, Miralem Pjanic leh Danilo te chu hliam vangin an inlan thei dawn lo vek a, coach Maurizio Sarri tan lungngaihna tham a ni. 

Hriat tel tur chu Juventus hian an league match hnuhnung berah 0-0 in Fiorentina an inhnehtawkpui ve tho a, an phur vanglai a ni lo.