De Gea-a'n contract a pawt sei ta

18th September, 2019

Manchester United chuan goalkeeper David de Gea chu kum 2023 thleng contract an ziahpui.

Spanish keeper De Gea chuan, "Ka hmalam hun kan tichiang tawh a, tuna ka duh ber chu kan club hi nomawi chawipui a ni a, kan tih theih pawh ka ring. Club ropui taka kum riat chhung ka khel thei hi ka inchhuang hle," tiin a sawi.

Spain goalkeeper hlawh zat hi official-a tarlan awm lo mah se kar khatah £350,000 ($633,400) aṭanga £375,000 ($678,700) inkar vel hlawh tura ngaih a ni a, hemi hi a dik a nih chuan khawvela goalkeeper hlawh tam ber a ni ang.

Kum 28 mi De Gea hian June 2011 khan Sir Alex Ferguson-a enkawl Manchester United chu Atletico Madrid aṭangin pound maktaduai 18.9 in a zawm a, English club tan hian match 367 a inlan tawh. De Gea hian Spain tan match 40 a khel tawh a, United hi 2012-13 season khan Premier League nomawi a chawipui bakah Europa League, FA Cup leh League Cup-ah te a champion tawh bawk.

Spanish club lian Real Madrid leh De Gea hi transfer hun apiangin sawi zawm an ni ṭhin a, September 2015-ah phei kha chuan document pawimawh chinfel hman loh vang chauhin a zawm lo. United hian kum hnih liam ta aṭang khan De Gea hi contract pawh seipui tumin an dawr tawh ṭhin a, tun season tawp rualin a contract zo dawn mah se risk lain an chelh lui a, an hlawhtling ta chiah.

Norwegian manager Ole Gunnar Solskjaer chuan, "David-a'n hun rei zawk cham tura contract a ziak hi ka lawm takzet. United-ah khawvela keeper ṭha ber a ni tih a lantir a, Manchester United ropuina rama hruai kir leh kan tumna kawngah hmun pawimawh a chang. Amahah hian keeper-in nei tura kan duh zawng zawng chu a awm vek a ni," tiin a fak hle.

David de Gea hian tun season Premier League match nga khelh tawhah a la inlan vek a, Chelsea leh Leicester City an hneh ṭumin clean sheet a nei tawh a ni.

De Gea @ United

• 367 games

• 910 saves

• 130 clean sheets

Nomawi leh Chawimawina

1x League Cup

1x FA Cup

1x Europa League

1x Premier League

5x PFA Team of the Year

4x Sir Matt Busby Player of the Year

1x FIFPro World XI

1x Golden Glove