Group of Death - Chak an awm lo

Kumin UEFA Champions League-a Group of Death tia chhal theih group F-ah chak an awm lo. Barcelona-in Signal Iduna Park-ah mualneitu Borussia Dortmund an chelh hram a, Inter Milan-in vannei takin Slavia Prague an draw bawk.

Thawhlehni zan inkhelah Dortmund captain Marco Reus penalty pet chu Barca keeper Marc-Andre ter Stegen-a'n dan sakin goal hmuh tur a awm lo. San Siro-ah Slavia Prague-in Peter Olayinka hmangin an khung hmasa a, mualneitu Inter Milan-in injury time-a Nicolo Barella goal hmangin an sut.

Barcelona-in squad-ah Lionel Messi an dah a, Argentine forward hi second half-ah luhtir mah se khelmuala che ṭha ber chu Germany international keeper Marc-Andre ter Stegen a ni thung. Catalan club hian point khat an hlawhchhuah avangin an lawm ang.

Borussia Dortmund-in 'yellow wall' hmaah Barca an hlau lo a, attacking football khelin na takin Barca an nawr ngam. Yellow wall an tih hi Dortmund khelmual South Stand a ni a, feet 328-a thui leh feet 131-a sang niin BVB 

ṭantu ruhkawl 25,000 vel an ding thei a, German club chakna thahrui an ni. Barca nen pawh hian Dortmund ṭantute hi Champions League final atana mawiin an khawsa.

Dortmund hian tlarhmaah Paco Alcacer mal tlattirin Reus, Jadon Sancho leh Thorgan Hazard ten an thlawp a, inelna sanga hming chher tawh vek an ni. Captain Reus-a'n chance ṭha nei hmasa berin keeper Ter Stegen a hmachhawn hnuah a ti goal lo.

Second half minute 57-naah English winger Sancho penalty hlawhchhuah chu Reus-a'n petin Ter Stegen bawkin a dansak. Chutihrualin Barca keeper hian goalline a pelh thui avangin VAR-in dem a hlawh hle. Substitute Julian Brandt-a'n crossbar rawn pet per bawkin hun tawp thlengin mikhual an nawr bet. Dortmund tan Barca laka point khat hi a ṭhaah a ngaih theih a, tun ṭumah erawh hun tawp hamrik zawha an chet danin hun ṭha an bawhpelh tih a lantir.

Barcelona tan kum 16 leh ni 321 mi Ansu Fati-a'n bul a rawn ṭan a, Champions League-a Catalan club tana bul ṭan naupang ber niin UCL-a khel thei naupang pathumna a ni bawk. Fati hi inkhelh ṭan tir lam minute 20 chhung chu ball khawih tam ber a ni chho a, player langsar zawk Antoine Griezmann leh Luis Suarez te nen an inthlawp ṭha hle.

Amaherawhchu, Dortmund-in second half-ah bul an ṭan ṭhat avangin manager Ernesto Valverde tan inhliam damkawr Lionel Messi dahluh a ṭul a, Fati-a'n khelmual a chhuahsan thung. Dortmund ṭantu hmaah Messi pawhin inkhel a thlak danglam thei lo a, point erawh an hlawh chhuak hram. Barcelona-in UCL group stage-ah match 14 chhung chu German club lakah chak loh an nei lo a, he record hi October 2001-a Bayer Leverkusen an hmachhawn aṭanga 

inṭan a ni.

Antonio Conte hnuaiah Inter Milan-in player langsar an lakluh bawk avangin beiseina sang tak an nei a, amaherawhchu Europe-a fiahna hmasa ber an hmachhawnah an mualpho tiin a sawi theih. Italian club nena inhnehtawk Slavia Prague hi a vawi hnih nana UCL group stage-a inlan ve chauh an ni.

Inter tan Sassuolo aṭanga loan hmanga an hawh Stefano Sensi a che ṭha leh a, Italian midfielder freekick pet chu Stefan de Vrij leh Danilo D'Ambrosio ten an khung teuh hle. Argentine striker Lautaro Martinez pawhin Italian club tan chance ṭha a nei bawk.

Mahse, second half-ah erawh Prague an khel ṭha zawk a, an phu ang ngeiin Peter Olayinka-a'n UCL match a khelh hmasak berah minute 63-naah goal hmahruai a khung. Czech club-in point thum beisei hman mah se minute riat hun pek belh a ni a, injury time-ah Sensi-a'n box pawn aṭangin crossbar a pet per. Italian midfielder hian ui hman viau mah se hemi per hi substitute Barella-a'n a volley goal a, 1-1 in inkhel a tawp.

Kum 22 mi Barella hi Champions League-a a vawi khat inlanna a ni a, Cagliari aṭanga an hawh a ni. Conte hian Manchester United aṭanga an hawh Alexis Sanchez erawh bench-ah a ṭhut tluantir thung. Inter Milan-in team awlsam ber tura ngaih an muala an draw ṭawk avangin hmabak a harsa sawt dawn a, October thlatira Nou Camp an tlawh hunah chuan insiamṭhat an mamawh khawp ang.