Manuel Correa dinhmun a ṭha lo

Car intlansiakna hmuna chesual Formula 2 driver Juan Manuel Correa chu a dinhmun a ṭha lo chhunzawm a, nikhua a la hriat theih loh avangin Intensive Care Unit (ICU) ah dah rih a la ni.

August 31 khan Belgian Grand Prix an tlan dawnin Formula 2 driver pathum an chesual a, an zinga pakhat French driver Anthoine Hubert chu damdawi in pan pui a nih hnuah a thi a, vui liam a ni tawh.

Kum 30 mi Correa hi a ke hliam zai ngai a ni a, mahse a chuap dinhmun a la ṭhat loh avangin zai ngam a la ni lo. A chuap a ṭhat hunah chuah a ke hi zai a ni ang, tunah hian London hospital-ah enkawl mek a ni.

Ecuador-a piang, American khua leh tui nihna nei Correa hi an chetsualtirh khan darkar li chhung zet zai a lo ni tawh. A tirah chuan a chhungte pawhin a dinhmun a ṭhat thu an sawi. Mahse, thawk lamah harsatna a neih avangin London-ah hian an hruai.

Race Tech Develop-ment Group lam chuan thuchhuah siamin, "Juan Manuel hi Intensive Care Unit-ah a la awm reng, a chuap chiang loin thawk lamah harsatna a siamsak. Hun rei vak lo hnuah chuan zai theih tura a dinhmun a ṭhat kan duhin kan beisei," an ti.