Mega Boxing-ah Mizo inlan dawn

Sete Boxing Academy (SBA) chu chona thar hmachhawn turin Delhi-a neih ṭhin Mega Boxing-ah an tel dawn. SBA zirlai Khawruhlian tlangval Lalrinsanga chuan September 21, Inrinnia neih tur Mega Boxing-ah Dirgari Mahesh a hmachhawn dawn.

Mega Boxing hi Las Vegas-a neih ṭhin Boxing event entawna siam a ni a, zan khatah hian bout ruk awmin boxer 12 an inlan dawn. Rinsanga hi lightweight division (61kg) ah a tel dawn a, a khingpui tur Cultfit team-a mi Dirgari Mahesh hi vawi thum inhnek tawhin vawi hnih a chak a, vawi khat a khingpui a inhnehtawkpui.

Coach Sete chuan, "Rinsanga hi Mizo zinga skills nei ṭha ber zinga mi a ni a, ka ringtawk hle. Amah hian Professional boxing luhchilh a duh avangin sipaia sawmna te pawh a hnawl a, a hlawhtlin ngei hi ka beisei tlat a ni," tiin a sawi.

Rinsanga hian national-ah medal a la tawh a, national coaching camp-ah te pawh a tel tawh. Tun ṭuma a chet ṭhat chuan contract ṭha zawk a ziak thei dawn. SBA hian Mega Boxing-a Mizo boxer tam zawk an tel theih nan hma an la a, hemi kawngah hian hmahruaitu Rinsanga chet ṭhat hi a pawimawh ang.