Messi aia chungnun duh Ronaldo

Cristiano Ronaldo chuan khawvela footballer ṭha ber chawimawina Ballon d'Or awards chu a elpui ber Lionel Messi aia tam dawn a duh thu a sawi chhuak. 

Juventus forward chuan, "Football thawn-thuah chuan Messi a tel zel tawh ang. Mahse, ani khum tur chuan Ballon d'Or paruk emaw pasarih dawn a ngai dawn a, ka phu pawhin ka inhria a ni," a ti. 

Ronaldo hian Real Madrid tana a khelh chhung khan nomawi 15 a chawi hman a, heng zingah hian Champions League nomawi pali a chawi chu a tel. 

Portugal captain chuan, "Football-a ka hnathawh avang hian football chanchinah ziah tel ka ni ngei ang tih ka ring a, footballer ropui zingah ka tel a ni. "Ka tan chuan football khawvela ṭha ber ka ni a, mahse fan-ten chutiang ngaihdan chu min ṭawmpui kher lo a nih pawhin ka vui chuang lo," a ti. 

Ronaldo hi kum 34 mi a ni tawh a, a elpui ber Barcelona thiampuipa Lionel Messi chu kum 32 mi a ni thung.