European champion vullai a chuai

Tun season-a a vawi khat nan Liverpool an tlawm ve ta - Thawhlehni zan khan Napoli khelmualah Champions League khel turin an lenglut a, 2-0 in an tlawm. 

Napoli-in European champion an hre ve lo a, Dries Mertens (penalty) leh Fernando Llorente goal hmangin an lo ngam. Khawvel defender ṭha pawla chhiar tel Virgil van Dijk pawh Italy-ah meuh chuan khingpui goal khung tur 'assist' tu a ni a, Liverpool tan zan hriatreng tlak a ni lo. 

Hriat tel atana ṭha erawh Reds hian season hmasa khan group stage match away-ah hnehna an chang miah lo a, a hnuah nomawi an chawi tho. 

Cho leh cho  

Naples khawpuia inkhelah team pahnih an inngam tawn a, Liverpool-in tlarhmaa Mohamed Salah, Sadio Mane leh Roberto Firmino an neih chhuang mah se Napoli-in Mertens, Hirving Lozano leh Lorenzo Insigne an neih ve tho avangin an zam lo. 

Team pahnih hi goal khung tumin an innawr tawn zak zak a, Liverpool tan goalkeeper Adrian 'fakna' hmuh tur a awm leh ṭhin. Spanish goalkeeper Adrian hian Fabian Ruiz shot ṭha tak chu vawi hnih ngawt a dang a, Mertens-a volley hnai set sawt aṭanga a dan chu Alisson pawhin a aia ṭha zawka tih dan a hre bik kher lo ang. 

Napoli goalkeeper Alex Meret chu hna nei lo a ni bik lo - Salah leh Mane te goal khungna remchang a dan sak a, Napoli an him. 

Team pahnihin goal an khung reng loh hnuah Napoli vanneih hun a her chhuak a, penalty an hmu - Andy Robertson nen ball an inchuhna lamah Jose Callejon a tlu awlsam hret a, mahse referee berin penalty a pe. 

Mertens  chuan harsatna nei loin penalty hi goal-ah a chantir a, minute 82-na a nih avangin Liverpool tan nawr let a hautak tawh. Hun pek belhah Virgil van Dijk a chesual zui a, a ball pet let chu Robertson leh Adrian inringthul karah Tottenham forward hlui Llorente chuan goal-ah a chantir. 

Napoli mualah Liverpool an mualpho a, AC Milan (1994) hnua Champions League champion ni chunga match hmasa bera chak lo hmasa ber an ni. 

Liverpool-in Inrinni zanah Premier League an khel a, Thawhlehni zana Napoli hmachhawn tura zinchhuah lehnghal a ngai. Naples-ah Reds player-te an chau tih a hriat a, Jurgen Klopp-a player thlan dan a fuh tawk lo tiin a sawi theih bawk. 

Midfield-ah Jordan Henderson, James Milner leh Fabinho a remkhawm a, Georginio Wijnaldum hahdamtir ngai pawh ni se attacking pui tura Xherdan Shaqiri talin bul a ṭan lo kha a mak hle. Tlarhnungah dan pangngaiin Trent Alexander-Arnold, Joel Matip, VVD leh Robertson a rem a, an chau tih a hriat - Dejan Lovren leh Joe Gomez te bench-ah an awm tluan lawi si. 

Ṭum dang angin Firmino a ṭangkai tawk lo a, Brazilian forward 'reh' chhanah Napoli defender Kalidou Koulibaly chu fak phu a ni. 

Salah leh Mane ten an inkar buaina an chingfel tawh tih social media kaltlangin an pholang a, Napoli laka an inkhel en chuan an in 'care' ta mah mah niin a lang. Egyptian forward-in ṭum danga huai taka a pet maina ṭhinah a pet ngam lo a, Mane a danglam lo - assist tumin an inzawng a ni ber!

Counter attack-a Mane-a'n Salah tana a pek, kal chak ta hret kha, an en let apiangin an ui vawng vawng ang. Liverpool hian Pathianni zan Premier League-ah Chelsea an lenchilh nghal dawn.