England-ah Siami awmna India zin dawn
Hockey India chuan Engaland nena match nei tur player 18 a puang chiang a, an zingah hian Lalremsiami Hmar a tel. Inelna hi September 27 aṭanga October 4 chhunga neih tur a ni a, ram pahnihte hi vawi nga an inkhel ang.
India nulate hi Olympic qualifier-ah United States nen November thla hian an inkhel dawn a, chumi inbuatsaih nan chuan tour hi an nei. Thla hmasa mai pawh khan Japan nen Olympic test event hi an lo nei tawh.
Chief coach Sjoerd Marijne chuan, "Senior leh junior kan koh pawlh a, tun hnaia an khelh ṭhat dan leh ram tana an sulhnu aṭangin an thlir tel bawk. Player tinin inbuatsaihna an nei ṭhain an fit hle, kan zin chhuah turah pawh beiseina kan nei sang.
"Kan thil tum ber chu Tokyo Olympics 2020 khel tura tlin a ni. Chumi tur chuan kawng zawh tur hautak kan nei, tuna kan zin chhuah tur hian Olympic Qualifier kan khelh tur atan nasa takin min puih ka ring," tiin a sawi.
India Squad
Goalkeepers: Savita (Vice-Captain), Rajani Etimarpu.
Defenders: Deep Grace Ekka, Gurjit Kaur, Reena Khokhar, Salima Tete.
Midfielders: Sushila Chanu Pukhrambam, Nikki Pradhan, Monika, Neha Goyal, Lilima Minz, Namita Toppo.
Forwards: Rani (Captain), Vandana Katariya, Navneet Kaur, Lalremsiami, Navjot Kaur, Sharmila Devi.