Federer-a'n Olympic sawichiang thei lo

Roger Federer chuan season thar a hman chhoh dan tur a la sawi chiang thei lo a, a ropui tawh ṭhinna Wimbledon erawh khelh ngei a tum thu a sawi lang thung.

Tennis player ropui hian Grand Slam nomawi 20 zet a nei tawh, Masters title pawh a la hnem tawh hle. Mahse, ram tan singles-ah Olympic gold medal erawh a la vaw chhuak lo; nakkum nipui laiin Japan khawpui Tokyo chuan Olympic hi a thleng dawn a ni.

Kum 38 mi Federer chuan, "Olympic khelh theihna remchang a awm leh hi a lawmawm, mahse ka inlan dawn em tih erawh ka sawi thei lo. Ka ruahman dan chuan ṭha taka Wimbledon khelh ka duh, chumi atan chuan Tokyo lama inelna neih pawh a ṭha viau mai thei," a ti.

Rafael Nadal leh Andy Murray ten Olympic gold medal an nei tawh a, Swiss star hian a chawlh hma ngeiin infiamna khawmpui lianah hian ropuina chang ni sela chuan a ropuina a belhchhah zual ngei ang.

Swiss player chuan sawi zawmin, "Beijing-ah khan Stan Wawrinka nen doubles-ah kan champion a, London-ah khan silver medal ka la bawk. Kum 2000 khan kei leh ka nupui hian kan hnam puanzar kan keng tawh, he infiamna khawmpui lianah hian sulhnu nei lo chu ka ni lem lo," a ti.

A kum a upat deuh tawh avangin Federer hian tournament khelh tur a thlang fimkhur tawh a, inelna zawng zawng a hmachhawn tawh lem lo. Season thum zet a khelh loh hnuah kumin hian French Open pawh a khel ve leh chauh a ni. Season tharah pawh tournament a khelh hnem a rinawm lem lo.