Juventus lakah Atletico Madrid an tlawm lo

Minute 89 leh second 30 a nih thlengin Juventus chu Atletico Madrid laka point thum hmu thei dinhmunah an ding. Hun a tawp meuh chuan 2-2 a ni a, Spanish club-in an mikhual lakah point khat hlu tak an sual chhuak.

Nilaini zan Champions League Group D inkhel dangah Lokomotiv Moscow chuan 2-1 in Germany club Bayer Leverkusen an hneh thung a, point thum hmuin group hmahruaitu an ni rih.

Season hmasa Champions League final khelhna Atletico Madrid khelmual Wanda Metropolitano Stadium-ah Juventus an tlangnel, winger Juan Cuadrado-a'n minute 48-a Jan Oblak dan theih loh tura a ball pet kum luh mawi tak bakah Frence international Blaise Matuidi (65') te hmangin 2-0 in hma an hruai.

Manager rorum Diego Simeone naute an tlawm duh lo, Stefan Savic chuan minute 70-ah chiang zet maiin six yard box chhung aṭangin a tauh lut a, an beiseina meichher thi ṭep chu chhem nunin a awm. Hamrik hnuhnung rik nan minute thum vel chauh a awm tawh. Atletico lamin corner an hmu, match pumpuia khel ṭha tak Kieran Trippier-a cross chu Hector Herrera chuan si phurh sut zawh nan a tauh lut a, khelmual chhung thawm a ring hle.

Cristiano Ronaldo-a'n hun tawp hmain chakna goal khung theihna hun nei mah se goal zawnah a kal lo. Arsenal midfielder hlui Aaron Ramsey chu bench aṭanga dahluh niin, Turin club tana a match hmasa berah danglamna siam turin hun a ngah lo.

Juventus hian an captain Giorgio Chiellini chu hliam vangin kumin chhung an chhawr thei dawn lo a, a hmun ruak luahtu Matthijs de Ligt hi theihna nei sang tak ni mah se Leonardo Bonucci nen an la inkawp rem tawk lo deuh niin a lang.

Italian champion manager Maurizio Sarri chuan, "Goal kan khung har avangin Fiorentina nen kan inkhel nen pawh khan a inanna lai a awm. Nitin training-na hmunah thil ṭha kan zir a, hmasawn tur kan nih laia hun tawp dawna ven theih tura ngaih goal hnih kan chhuah kha chu a pawi," tiin a sawi.

Juventus defender Leonardo Bonucci chuan, "Rang taka ball inpe kual chunga kan nawr kha chuan Atletico kha an buai hle, goal tam zawk khung thei kan nih laia kan inveng ṭha tawk lo kha a pawi hle," a ti.

Tottenham Hotspur defender hlui Kieran Trippier-a'n goal pawimawh a siamsak a, England international hlui hian tlin taka a hna thawkin Ronaldo a veng ṭha hle. Portugal captain a ven karlakah hian tlarhma pui turin cross hlauhawm a nei nual bawk.

Kum 29 mi Trippier chuan, "Player thar kan tam a, mahse pre season aṭanga kan thawhrim avangin team nghet tak kan ni tawh. Goal hnih kan chhuah avangin a pawi kan ti, chutihrualin inkhelh chhung zawng khan a thawkrim leh chak phu zawk chu kan ni," a ti.

Atletico Madrid hian player thar an ngah a, a bik takin tlarhnung hi an danglam nasa hle. Captain Diego Godin leh Juanfran te hmunruakah Stefan Savic leh Jose Gimenez te an ding. A sirah Trippier leh amah ang thoa player thar Renan Lodi te an ding.

Argentine manager Simeone-a'n hun rei lote chhungin tarhnung khawng tak a rem khawm leh hman, Juve lakah goal hnih chhuah mah se Ronaldo leh Gonzalo Higuain te awmna an dang thei hle; team hmuhnawm leh khawng zual zawk a din chhoh leh ngei a rinawm.

Atletico Madrid    2 - 2    Juventus

ATL : Stefan Savic 70'; Hector Herrera 90

JUV : Juan Cuadrado 48'; Blaise Matuidi 65'

Bayer Leverkusen    1 - 2    Lokomotiv Moscow

BAY : Benedikt Howedes 25' (OG)

LOK : Grzegorz Krychowiak 16'; Bmitri Barinov 37'