NorthEast United striker thar Gyan

Indian Super League club NorthEast United-in Indian football boruak ri hat khawpin player thar an nei a, Sunderland striker hlui Asamoah Gyan an lalut!

Kum 33 mi striker chuan, "Hun thar duhawm ka tawng hi ka lawm takzet a, NorthEast United chanchin ka hre nual a, season hmasa aia ṭhaa kan khelh theih ka beisei a ni," a ti. 

Ghana tan vawi 107 inlana goal 51 khung thei striker hian an ram club Liberty Professionals-ah a career a ṭan hnuin Serie A club Udinese, Modena leh French club Rennes tan a khel a, 2010-a Sunderland a zawm kha Mizo ten kan hmelhriat ṭanna a ni. 

Black Cats tana a khelh lai hian BBC African Footballer of the Year-ah thlan a ni a, 2011-ah rin loh takin UAE club Al Ain a zawm. Al Ain tan hian match 123-ah goal 123 a khung a, a hunlai hian khawvela footballer hlawh hnem ber pawl niin kum khatah pound maktaduai ruk a hlawh - Sunderland-a a hlawh let li vel a ni. 

July 2015 khan Chinese Super League club Shanghai SIPG a zawm a, kar khata £227,000 a hlawh chu khawvela fooyballer hlawh hnem pawl zingah chhiar tel a ni. SIPG-a season hnih a khelh hnuah UAE club Shabab Al-Ahli Dubai leh Turkish club Kayserispor tan a khel zui a, Indian football-ah hial a hmel kan hmu dawn ta. 

CAF Team of the Year-a vawi thum lang thei striker hian World Cup 2010-ah khan Ghana chu quarterfinal a luhpui a, World Cup 2014 khel bawkin African player zinga World Cup goal khung hnem ber (6) record a chelh mek. 

Africa Cup of Nations-ah vawi hnih final a lut a, ram tana goal 51 a khung aia tam Ghana tana khung thei an awm rih lo.