Judo huangah Iran an hrem

International Judo Federation chuan Saeid Mollaei chungchanga thil thleng vangin Iran chungchang a ngaihtuah a, khawvel huap inelna liana tel thei lo rih turin Iran hi an hrem.

Japan-a neih World championship-ah Iran tlangval Saeid Mollaei chu Russian aiawh Khasan Khalmurzaev nen an inkhelh dawnah a inhnukdawk a, a inhnuhdawh chhan hi a chak a nih chuan a match lehpekah Israel tlangval Sagi Muki nen an inhmachhawn theih vang a ni.

Iranian athletes reng reng chu eng infiamna huangah pawh Israel infiammite nen an inhmachhawn phal a ni lo. Mollaei chuan, "Ka thawkrim a, midang hmachawn pawh ka chak. Mahse, National Olympic Committee of Iran leh Sport Minister chuan inelna hmachhawn lo turin min ti," tiin a sawi.

Mollaei hian amah leh an chhawngkaw himna a ngaih pawimawh thu a sawi bawk a, a thusawi hian ngaihven a hlawh. International Judo Federation chuan thil thlen dan ngun taka a ngaihtuah hnuah Iran hi a hrem.