Kohli hoin India an chak

India chuan T20 series match thum khelh tura vawi hnihnaah Nilaini zan khan wicket sarihin  South Africa an hneh a, series-ah 1-0 in hma an hruai.Match hmasa ber ruahsur vangin an khel thei lo a, match thumna hi September 22 hian M. Chinnaswamy Stadium, Bengaluru-ah an khel ang.

Mohali, Chandigarh-a inkhelah hian South Africa-in run 149 an siam a, India-in captain Virat Kohli-a run 72 hmangin target hi an umpha.

South Africa tan captain thar Quinton de Kock-a'n bul a ṭan ṭha a, run 52 a vaw chhuak.

De Kock hi Temba Bavuma-a'n run 49 siamin a rawn thlawp ṭha. Amaherawhchu Proteas batsman dangah che ṭha fal an awm tawh lo a, target 150 an tlin avangin chakpui theih a ni.

South Africa captain De Kock half century chhanletna India captain-in a nei a, Virat Kohli-a'n thi loin run 72 a siam.

Shikhar Dhawan pawhin run 40 a siam a, over khat dah bangin India hian run 151 siamin an chak. India hian tun hmain South Africa hi an mualah T20 bikah vawi hnih an hmachhawn tawh a, October 2, 2015 khan Dharamsala-ah wicket sarihin an hneh lo. October 5, 2015-ah wicket rukin an hneh lo leh bawk a, tun ṭum hi India-in South Africa an muala an hneh hmasak ber a ni.

Kum 30 mi Kohli hian match 71-ah run 2441 siamin 50.85 average a nei pha a, record thar a siam. Hemi hmaa record neitu Rohit Sharma-a'n match 97-ah run 2434 (ave 32.45) a siam thung.

India captain hian run 50 aia tam siam hi vawi 22 a nei a, Rohit Sharma record vawi 21 a khum. Kohli hi 50s vek a nih laiin Rohit erawh century vawi li leh 50s vawi 17 a ni. Kohli hian inelna hrang hrang Tests (53.14), ODI (60.31) leh T20 (50.85) ah average 50 a nei pha vek. India captain chuan, "Ka tan chuan ram tana khelh hi a hlu em em a, hnehna chang tur chuan ka theihna zawng zawng ka chhuah zel ang," tiin ram tana a inpek thu a sawi.