Real veltu 'di hlui' chang hnu Di Maria

Hmana Real Madrid duh loh Angel di Maria kha tunah chuan Madrid khaw club veltu a chang ta a, Nilaini zan khan a club hlui lakah goal hnih a khung. 

Champions League group stage match-ah Real Madrid-in Paris St-Germain an lenchilh a, an mikhualna ramah 3-0 in an tlawm. French club tan Di Maria bakah Thomas Meunier chuan goal khat a khung ve bawk a, Zinedine Zidane nauten a chhanletna tur an nei lo. 

Real Madrid mualphona belhtu chu hei hi a ni - tlarhmaa PSG first choice pathum Neymar, Edinson Cavani leh Kylian Mbappe te an inlan thei lo vek!

Inkhel ṭantir aṭangin PSG-in Real an ngam nghal a, minute 14-na lekah goal hmasa ber kan hmu nghal -  Juan Bernat hnen aṭanga a ball hmuh chu Di Maria chuan goal-ah a chantir. 

Argentine forward hian minute 33-naah player class sang a ni tih pholangin a goal hnihna a khung chhunzawm a, Thibaut Courtois-a'n tih theih a nei lo. Real beiseina chhi nung turin Gareth Bale-a'n rawn khung ve zawk mah se referee Anthony Taylor-a'n VAR a rawn hnuah handball vangin a pawm lo a, second half-a Karim Benzema khung pawh offside vangin a pawm chuang lo. 

PSG hian hun pek belhah Meunier goal hmangin an khung chhunzawm leh ta zawk a, mualneitu hi 3-0 in an chak. 

Neymar, Cavani leh Mbappe-te a ruala chhawr theih loh chuan eng manager tan pawh manganna tur a ni a, mahse PSG an buai lo. 

Di Maria piahlamah Pablo Sarabia leh Mauro Icardi te an hmuhnawm a, Real-in tlarhnungah hruaitu ṭha Sergio Ramos awm lo an tuar tih a lang. Bernabeu-a season nga a khelh chhunga player hmuhnawm tak Di Maria kha kan hmu leh ta a, kum 31 mi forward hi a tlan dan, positioning leh finishing fak tlak vek a ni -  Real full back Dani Carvajal a nghaisa a ni ber!

Real fan-ten uluk taka an thlir chuan kum 2014 Champions League final-a nomawi an chawi chhan player kha an hmu tih an inhria ang a, an lung a leng khawp ang - hattrick siamna remchang a neih a chhawr lo mah mah. 

Champions League-a nomawi chawi ngun ber (13) ni mah se Real Madrid an talbuai a, Zidane-a'n nipui transfer-ah sum a seng hnem chungin result ṭha a nei hleithei lo. 

Nipui transfer-a a lakluh zingah Real tan Eden  Hazard, Ferland Mendy leh Eder Militao ten inkhel bul an ṭan a, Real tana Champions League match an khelh hmasak ber hi theihnghilh daih an duh ang! Pahnih man belhkhawm pound maktaduai 90 tling thei Luka Jovic leh Rodrygo te chu bench-ah dah an ni a, Jovic hi minute 70-naah luhtir ni mah se an beisei goal erawh a keng tel lo. 

Real hian hliam vanga Luka Modric an chhawr theih loh an tuar tih a lang bawk a, Toni Kroos leh Casemiro te inkawpin midfield-ah Marco Verratti, Idrissa Gueye leh Marquinhos inkawp an ngam lo. 

Season hmasa chanve-a Real chhanhim tura lokir Zidane-a'n beisei angin result a la nei thei lo a, French manager hi a him zel ang em? tih chu zawhna awm ṭan a ni ta. 

Real hian league lamah pawh beisei an phak lo - match li an khelh tawhah vawi hnih chiah an la chak a, vawi hnih an khingpui an inhnehtawkpui. Spanish club ṭantuten an 'specialist' na nia an ngaih Champions League-ah pawh beisei ang result an nei thei chuang lo a, Real 'puja' fuh lai a ni lo. 

Pathianni zanah La Liga match khel turin Sevilla an lenchilh nghal dawn a, hnehna an chan loh chuan Zidane chungah 'pressure' a sang lehzual ang. 

Club Brugge    0 - 0    Galatasaray

Paris St-Germain    3 - 0    Real Madrid

PSG: Angel di Maria 14', 33'; Thomas Meunier 90+1'