Hammers-in Arnautovic chhuah phal

West Ham manager Manuel Pellegrini chuan an striker Marko Arnautovic chu club tana ṭha tur zawk a nih dawn chuan chhuahtir an pawi tih loh thu a sawi. 

Austrian forward hi Chinese Super League club Shanghai SIPG ni ngeia ngaih chuan pound mak­taduai 35-a lakluh tumin an dawr a, kum li chhung atan kar khatah £200,000 hlawh tir an inhuam a ni. 

Pellegrini chuan, "Hetiang taka sum tam thama dawr hi chuan chhuah an duh tlangpui a, mahse Arnautovic hian he club-ah hian contract a nei mek a ni. 

"Club leh player tana ṭha tur zawk a nih chuan Marko tel loa kal dan tur kan ruahman ang. Mahse, club chuan a chhuah hi a remti rih lo a ni," a ti. 

Arnautovic-a unaupa leh a agent ni bawk Dani­jel Arnautovic chuan a unaupa hian China pana West Ham chhuahsan a duh thu a lo sawi tawh. 

Kum 29 mi Austrian forward hian 2017 khan Hammers player manto ber ni turin West Ham hi Stoke City aṭangin pound maktaduai 20-in a zawm a, kum 2022 thleng contract a la nei. 

Season hmasa khan Hammers tan hian match 35 khelin goal 11 a khung a, tun season-ah match 18 khelin goal riat a khung leh der tawh.