Uzbekistan ngamtu Japan - last 16 lut a hriat kim

Asian Cup 2019 group stage match chu Ningani zan khan khelh zawh a ni a, inkhel ngaihven hlawhah Japan chuan 2-1 in Uzbekistan an hneh. 

Match hnih an khelh tawha goal ruk ngawt khung­tu Uzbekistan tan Eldor Shomuro­dov chuan minute 40-naah goal hmahruai khung mah se Japan hian minute thum hnu lawkah Yoshinori Muto hmangin an chhanglet nghal a, second half-ah Tsukasa Shiotani chuan chakna goal a khung zui. 

Japan hian match thum an khelhah hnehna chang vekin last 16 an lut a, Uzbekistan hian Japan an hmachhawn hmain point ruk an nei tawh sa a, chak lo mah se last 16 an lut ve tho. 

Ningani zan inkhel dangah World Cup 2022 thlengtu tur Qatar chuan nasa takin hma an sawn tih an pholang a, Saudi Arabia chu 2-0 in an hneh. 

Qatar tan Almoez Ali chuan goal hnih a khung a, tun inelnaah goal sarih a khungna niin top scorer a ni mek - Qatar hian match thum an khelhah hnehna an chang vek.

Lebanon-in last 16 lut turin goal li aia tama North Korea an hneh a ngai a, 4-1 in an chak - North Korea tana minute kuana leka Pak Kwang-ryong goal khung chu Lebanon vel ṭaptu a ni. 

Lebanon hian goal khat an chhuah hnuah Felix Michel, Hilal El-Helwe (2 goals) leh Hassan Maatouk (penalty) hmangin an chhanglet a, goal khat dang chauh pawh khung leh se last 16 lut tur an nih laiin an khung thei tawh lo a, Asian Cup an mangṭha. 

Asian Cup last 16-ah hian group paruka a sang pahnih ṭheuh chu a thiam 16 zinga tel chiang tur an ni a, pathumna zinga a ti ṭha paliin an zawm ve bawk ang. 

Lebanon hi 4-1 a an chak hian Kyrgyzstan, Oman leh Vietnam te nen point thum ṭheuh an nei a, Vietnam nen hian goal diffe­rence-ah pawh an intluk chiah.

Goal khat chiah khung belh leh se emaw goal kha chhuah lo se chuan Vietnam aiin goal difference-ah an ṭha ang a, last 16 an lut thei ang - mahse goal difference-a an intluk takah chuan goal khung hnem zawk en leh a ni a, hetah pawh an la intluk cheu hnuin disciplinary record nei ṭha zawk Vietnam an tlang!

Asian Cup last 16 lut a chiang a, Bahrain ngam loh avanga Asia khawmualpui football inelna sang ber mangṭha tu India tan a uiawm tulh tulh. 

Match tawp ber result aṭanga en chuan India khan Bahrain an ngam loh pawh khan, UAE-in Thailand hneh tal ni se chuan goal difference hmangin an tlang thei!

Mahse, UAE an chak zo lo miau a, mahni inchhan thei lo India hi team dang result pawhin a chhan thei lo - an thlirlet ang a, an ui vawng vawng ang. 

India awmna Group A ṭang­in point li neitu Bahrain chu pathumna ti ṭha zinga tel chunga last 16 lut an ni a, India hi Lebanon nen chiah point thum hmu phak zinga last 16 lut phak lo an ni.