Champion lai hnehtu Sharapova

Australian Open hmeichhe singles champion lai Caroline Wozniacki chu nimin khan Maria Sharapova hneh loin third round-ah vuak tlak a ni a, Russian nula hian hremna a hman zawh hnuah Grand Slam champion tura rinkai a nih phak zia a lantir.

Rod Laver Arena-a inkhelah Shara­pova hian darkar hnih leh minute 24 chhungin 6-4, 4-6, 6-3 in hnehna a chang a, Pathianni hian Ashleigh Barty nen fourth round an khel leh ang.

Kum 28 mi Wozniacki hian bul ṭan fuh zawkin set hmasa berah 4-1 in hma a hruai a, mahse game hnuhnung panga erawh Sharapova kutah a lut vek. Set hnihna hloh mah se, set hnuhnung berah erawh Grand Slam vawi nga champion tawh Sharapova bawk a chungnung.

World number 1 hlui Shara­pova hi 2016 khan damdawi hman phal loh a hmang tih hmuhchhuah a nih vangin thla 15 chhung hrem a ni a, April 2017 khan court chhungah rawn kir leh tawh mah se hlawh­tlinna lian a la chang leh lo.

Kum 31 mi Sharapova hian beiseina sang tak nen kuminah season bul a ṭan a, tuna a khelh chhoh dan thlir chuan nomawi lian a chawi leh a nih pawhin a mak lo ang. Sharapova chuan, "Inelna sang tak a ni a, inkhel hautak tak ka paltlang a ni," tiin a sawi.

Nimin inkhel dangah kum 17 mi lek Amanda Anisimova chuan seeded 11-na Aryna Sabalenka chu 6-3, 6-2 in a hneh ve bawk. Anisimova hi kum 2000 hnu lama piang zingah Grand Slam fourth round lut thei hmasa ber a ni.

World number 87 Anisimova chuan, "Ngaihtuah thiam a har, tun huna hetiang dinhmun ka thleng hi a mak," a ti. Match lehpekah Wimbledon vawi hnih champion tawh Petra Kvitova a hmachhawn ang.