Roger Federer a ding nghet zel

Australian Open champion lai Roger Federer chuan nimin khan Taylor Fritz lakah hnehna changin fourth round a inhlangkai a, mipa tennis player zinga Australian Open nomawi vawi sarih chawi thei hmasa ber nih a tumna a chhawm nung zel.

Melbourne Park-ah ruah tlem a sur a, hei vang hian Rod Laver Arena chu a chung khuhna hman niin, nipui lai a nih vang erawh chuan khaw lum erawh a nep phah tak tak thei chuang lo. Federer hian darkar khat leh minute 28 chhung lekin 6-2, 7-5, 6-2 in hnehna a chang.

Australian Open vawi ruk champion tawh Federer hian a match lehpekah chuan Stefanos Tsitsipas a hmachhawn leh ang. Seeded 14-na Tsitsipas hian inkhel dangah Nikoloz Basilashvili chu 6-3, 3-6, 7-6 (9-7), 6-4 in a lo hneh ve bawk.

Kum 37 mi a ni tawh a, a vanglai anga thahrui a ngah tawh loh avangin Federer-a'n set thum chhunga tlang zel a tum. Swiss star hian a service neih ṭhat a la kalsan lo a, a khingpui Fritz lakah a service hloh miah loin; aces vawi 10 a vaw chhuak a ni.

Grand Slam vawi 20 champion hian set khatna bika a service ṭumah a khingpui hi point hnih bak a pe lo, point hnuhnung ber hmu tur pawhin aces a vaw chhuak a, American tlangval tan Federer lakah tih theih a tam lo hle.

Australian Open bika a match 100-na khel tlingtu Federer chuan, "A rang thei ang bera a service chhuhsak kha ka tum ber a ni a, ka tih theih chinah kha chuan set khatna lak kha a harsa lo. Mahse, set hnihna bikah kha chuan a inveng thiam em em a, point ṭhentkhat harsa tak taka hlawh chhuah ngai a awm khan a ti nuam hle," a ti.

Ningani zan khan world number 1 Novak Djokovic pawhin Jo-Wilfried Tsonga chu 6-3, 7-5, 6-4 in a hneh ve bawk. Serbian tlangval hian vawiin tlai hian rawlthar beiseiawm tak pakhat Denis Shapovalov a hmachhawn leh ang - Djokovic hi Federer ang thoin a champion a nih chuan Australian Open bika a nomawi pasarihna a ni dawn.

Djokovic leh Tsonga te hi 2008 Australian Open final-ah khan an intawng tawh a, inkhel hautak takah Djokovic a ding chang. Player pahnih ten season hmasa an hman dan a inang lo a, hliam vangin French tlangval a inlan mumal theih loh laiin Djokovic erawh world number 1 thei kawpin a khel ṭha.

Kum 31 mi Djokovic chuan, "Player thahrui ngah kan hmachhawn a nih chuan match tir lamah hian rilru a zauthau a, inrintawkna hloh a awl hle. Tun ṭumah erawh a tir aṭanga a tawp thlengin ka buai lo," tiin a sawi.

Ningani zan inkhelah Alexander Zverev chuan Jeremy Chardy lakah fiahna hautak a paltlang. German tlangval hian Australian Open third round lut turin set nga an khelh zawh hnuah hnehna a chang a, chak turin vanneihna a mamawh tel.

Kum 21 mi Zverev hian set hmasa pahnih a hloh zet hnuah 7-6 (7-5), 6-4, 5-7, 6-7 (6-8), 6-1 in hnehna a chang let thei a, fourth round-ah chuan khawtual tlangval wildcard hmanga inlan Alex Bolt nen an inhmachhawn dawn. Bolt hian darkar li chhungin Gilles Simon a hneh thei a, awlsam taka paltlang tum chi a ni bik lo ang.

Seeded palina Zverev chuan, "Jeremy hi player tawhkhirh tak a ni, a khingpui dangte sawp chau vek thei tur khawpin theihna a nei. Set nga kan khel a nih chuan thahrui kan hmang hnem tih a chiang a, a pawimawh ber erawh round sang zawk khel tura ka tlang hi a ni," tiin a sawi.

Nimin inkhel dangah Tomas Berdych chuan tun hnaia khel ṭha tak, seeded 16-na ni phak Diego Schwartzman chu 5-7, 6-3, 7-5, 6-4 in a hneh. Berdych hian hliam vangin season hmasa a hmang ṭha lo a, a dan hnuah erawh a khel chhuak ṭha thei hle.

Tun inelna bikah Berdych-a'n seeded chang phak lo mah se, tun hma lama semifinal a khelh tawhna hmun a nih avangin a mikhual lo. Match hmasa zawkah pawh Britain player langsar Kyle Edmund a lo hneh tawh, match dawt lehah chuan Rafael Nadal leh Alex de Minaur te inkhela chak zawk a hmachhawn ang.

Australian Open hi tennis season khat chhunga Grand Slam tournament hmasa ber niin hard court-ah an khel a, January 14 khan khelh ṭan niin ni 27-ah mipa final khelh zawh tur a ni.