Robertson tan contract thar

Liverpool defender pawimawh Andy Robertson chuan Merseyside club tan rinawmna thu a tiam a, kum 2024 nipui thlenga khel turin contract thar a ziak. 

Kum 24 mi defender hian July 2017 khan Hull City aṭangin Reds hi pound maktaduai riatin a zawm a, a tir lamah Liverpool tan hmun chang tam lawk lo mah se season tawp lamah hmun pawimawh a chang chho a, tun season-ah chuan Premier League left back ṭha ber pawla chhiar ngam a ni tawh. 

Tun season Premier League-a match hnih chiah inkhel bul la ṭan lo Robertson chuan, "Club-in contract thar min zawrh rual khan inngaihtuah buai ka ngai lo a, awlsam takin contract ka pawtsei nghal a ni.

"Ka tan contract pawh-sei nuam tak a nih ang hian ka club tan pawh a nih ngei ka ring a, hei vang hian engkim a awlsam em em a ni. Kan hma hunah ni duhawm tak kan hmachhawn ka beisei," tiin Anfield-ah nomawi chawi ngei a inbeisei. 

Scotland captain Rob-ertson hma hian Joe Gomez leh Sadio Mane te chuan Anfield-a an contract an pawtsei tawh a, season ṭan dawn khan Roberto Firmino leh Mohamed Salah ten contract thar an ziak bawk - Reds fans tan chuan thu hriat nuam tak vek a ni.

Liverpool hian season duhawm tak hmang mekin Premier League-ah point liin hma an hruai fal mek a, an hmahruaina chhawm nun zel tumin zanin dar 8:30-ah Crystal Palace an mikhual ang.