Zaninah Khelo India football final

Khelo India Youth Games football final-ah Mizoram chuan zanin dar 7:30 hian Kerala  an hmachhawn dawn.

Under 21 final thleng tur hian Mizoram hian group stage-ah Kerala hi 3-1 in an hneh tawh a, amaherawhchu final-ah erawh eng result pawh thleng thei a ni.

Mipa final hi ISL club Pune City FC ground Shree Shiv Chhatrapati Sports Complex, Balewadi-ah khelh a ni dawn a, Mizoram chuan tun ṭumah hian he stadium-ah hian hun pangngaiah goal an la khung lo. Semifinal-a Goa an hmachhawn ṭumin minute 90 chhungin goal a lut lo a, penalty shootout-ah erawh 4-2 in hnehna an chang.

Final-a an khingpui tur Kerala hi semifinal-ah group B hmahruaitu Punjab nen hun pangngaiah 1-1 a an inhnehtawk hnuin penalty shootout-ah an chak.

 Mizoram manager Hmingthansanga chuan, "Kan dam kim a, training-na hmun kan nei lo hi duhthusam lo lai chu a ni mai a, amaherawhchu tlai lamah chuan tlangahte lawnin thlan kan titla tho. Player-te hnenah kan hneh tawh hnu a nih avanga zuam lo turin kan fuih uluk hle," tiin a sawi.

Mizoram coach Chawngthansanga pawhin, "Final kan thleng pha hrim hrim hi a lawmawm a, amaherawhchu Mizoram tana gold medal kan lak loh chuan kan inngaidam thei lo. Chuvangin kan theihna zawng zawng kan chhuah a ṭul," tiin a sawi ve bawk.

Vawiin chawhma dar 9:00 hian Mizoram hmeichhe team Under 21 chu third place inchuhnaah inelna thlengtu Maharashtra nen Police Ground-ah an inkhel dawn a; final-ah Tamil Nadu leh Manipur te an inkhel ang.