Australia-ah India an chak

India chuan Australia laka test series an lak hnuin ODI series an la leh a, nimin khan ODI match hnuhnung ber Melbourne Cricket Ground-a khelhah wicket sarih an chak.

Ṭhum vawrah India an chak a, vawm hmasak an thlang. Men in Blue bowler te an che ṭha a, Yuzvendra Chahal chuan run 42 pein wicket ruk a la. Australia hian run 230 chiah an siam a, over 48.4 ah an thi fai vek.

India bat hun a thleng a, Rohit Sharma (9) leh Shikhar Dhawan (23) te an thih hma avangin hmabak awlsam tura ngaih chu a harsa.

Captain Virat Kohli-a'n half century vaw chhuak pha loin 46 runs a siam a, mamawh chhanna chu MS Dhoni tho a ni.

Dhoni hi a vannei a, ṭum hnih a ball vuak an thlauh zarah run 87 zet a vaw chhuak a, Kedar Jadhav chuan ball 57 lekah run 61 zet rawn siam ve bawkin over 49.2-ah run 234 an vaw chhuak.

India hian ODI match thum khelhah 2-1 in series an la a, Test series an lak tawh bawk avangin tun ṭuma Kohli hote chet dan hi a ropui hle.