Club lian enkawl tur Mourinho

Manchester United-in an ban hnuah Jose Mourinho chu media hmaah a inlan a, Qatar tv channel beIN SPORTS nen contract ziakin Asian Cup-a Saudi Arabia leh Qatar inkhel kar lakah a inlan. 

Kum 55 mi Mourinho hian club enkawl nei lo mah se a zia erawh a la ngai a, a thusawi a la ngaihnawm reng. Portuguese manager hi Inrinni zana Arsenal leh a club hlui Chelsea inkhelh hunah a inlan leh dawn a, match hnih lek aṭang hian £120,000 chuang a hlawh ang a, India pawisa chuan vaibelchhe khat (nuai 100) a chuang daih a ni. 

Jose Mourinho chanchin sawifiahtu chu a kalna apianga nomawi a la zel hi a ni a; FC Porto, Chelsea, Inter Milan, Real Madrid leh Manchester United a enkawl tawh a, nomawi chawipui loh reng a nei lo.

Portuguese manager hi foot-ball mit aṭang chuan 'top class' a ni a, amah pawhin chutiangah chuan a indah. Mourinho chuan, "Team enkawl hi ka la duh. Kei chu inelna sang taka tel tur ka la ni a, chutiang hmun ngei chu ka awmna tur a ni," tiin league leh club tenau a la melh lo.

Mourinho chuan sawi chhun-zawmin, "Ka la naupang a, chutih rualin football-ah hian tawnhriat ṭhahnem tak ka nei tawh. Kar hnih khat hnuah kum 56 ka tling dawn a, ka kum hi thlir ula chawl tur chuan ka la naupang lutuk a ni," tiin football chawlhsan a la tum loh thu a sawi.

Football khawvela inhnialna lian ber pakhat chu Cristiano Ronaldo leh Lionel Messi ah tu nge ṭha zawk tih hi a ni a, hemi chungchang hi Mourinho pawh zawh a ni.

Mourinho chuan, "A ṭha zawk an sawi hian a dik thei lo. Ka ngaihdanah chuan player inang lo an ni. Player khelh hun inang lo an khaikhin te hi a dik lo, Pele leh Mbappe ah hian tu nge ṭha zawk tih te hi khaikhin theih a ni lo a, an ball pet te leh an chhehvela thil awm te hi a hrang daih a ni.

"Messi leh Ronaldo bikah chuan Ronaldo ka neih khan pa hlim tak ka ni a, kan khingpuia Messi a awm erawh chuan kan team-in hnehna kan chan theih nan nasa takin ka ngaihtuahna ka seng thung. Vawi khat hlawhtlin hi thil theih a ni a, vawi tam tak hlawhtlin erawh a har em em a ni a, anni hi chu kum 10 chuang an hlawhtling tawh a ni," tiin a fak dun hle.

Chelsea-a Mohamed Salah leitu chu Jose Mourinho a ni a, Egyptian forward an hralh danah erawh a insawifiah thung.

Mourinho chuan, "Champions League-ah Basel kan hmachhawn a, Salah hi player naupang mai a la ni. Kan tumpui tur tam zawk hi an player nen lam uluk takin kan zirchiang a, he nau hi ka ngaina nghal. Hetihlai hian attacking player ṭha Eden Hazard, Willian te kan nei chungin club thuneitute chu lei turin ka nawr a, ka lalut. Khatih lai khan chuan tuna a awmna striker ai mahin winger a ni mah zawk.

"Amaherawhchu London-a naupang bo pakhat a ni a, a chenna tharah a bo a, chher puitlin duhin puih duh mah ila a rilru a hmanhmawh a, inkhelh a duh. Chuvangin an football kalphung ka hriat chian Italy-a kal se ka ti a, Fiorentina chu kan thlan sak ta a ni," tiin a sawi a, a hnua a hralhtu chu club a nih thu a sawi bawk.