Zinedine Zidane: Real-in an dawh reng dawn em?

Kum 2016-18 inkar khan Zinedine Zidane-a'n Real Madrid chu Champions League-ah nomawi pathum a chawipui a, club president Florentino Perez nen an ngaihdan a in an loh avangin a chhuak zui. 

Mahse, hun tam a liam hman lo. Real-in Zidane thlak zotu an hmu lo a, thla ruk liam ta khan French manager hi Real enkawl tur bawkin a lo kir leh. Hlim taka nui chungin, "Ka in ngeia ka lo kir leh ta hi ka lawm a ni," tiin a sawi zui. Mahse, season thar hman a ni a, Zidane hmelah hlim nui hmel hmuh tur a awm ta rih lo. 

La Liga-ah beisei an phak lo a, Champions League-ah thawnthu a danglam lo. Zidane ban a nih hun tur khawvelin a thlir ta zawk - eng tak thleng ang maw?

Dawhtheihna chungchang kan ziak dawn a nih chuan Real nena tlarkhata ziah rem lo pawl tak a ni ang - he club hian 'manager ban' an harsat lo. 

Zidane-a'n season hmasa chanvea Real a rawn zawm hnuah match 16 a hmachhawn a, vawi sarih chiah a la chak - vawi li an inhnehtawk a, vawi nga a tlawm. Spanish football expert Guillem Balague chuan, "Perez bel hnaitu journalist-ten na takin Zidane an sawisel tawh a, chumi awmzia chu Real President hian Zidane ban a pawiti lo tihna a ni," a ti!

French football expert Julien Laurens chuan, "Thim tawpah êng a awm tih a hria a, a beidawng lo ang," tiin Zidane chuan banna a thehluh a rin loh thu a sawi. 

Real-in manager ban mai ṭula an hriat tawh chuan an insum ngai lo. Nikum October khan Spain national team aṭanga an thlem chhuah Julen Lopetegui chu thla li leh a chanve hnu lawkah an ban. 

Kum 53 mi thlak tura an lakluh Santiago Solari lah thla nga pawh nghak hman loin an ban a, March-ah Zidane a rawn kir. Ballague chuan, "Zidane hi a career-a a vanneih ṭhin anga a vannei a nih chuan season tawp thleng a daih ang," a ti ṭawk - a cham rei a ring lo hle. 

Belgian football journalist Kristof Terreur chuan, "Zidane hian he team tan hian eng hna nge a thawh? Eng kalphung nge a zawm? Champions League nomawi a chawipui dante pawh kha thilmak an la tling vek," a ti a, Zidane a dah sang lo. 

Perez-a'n khawvela manager a atchilh ber pawl chu Jose Mourinho a ni a, Chelsea manager hlui hming hi tunah chuan a ri ring leh tawh hle. 

Terreur chuan, "November-ah chuan Mourinho hian Real a enkawl tawh ang," tih hialin a sawi a, Potuguese manager hi a club hluiah a kir hreh a ring lo. Ballague chuan, "Real-in Zidane an ban chuan Mourinho an lalut ang tih hi chu kan rin dan sa vek a ni," a ti!

Khawvela manager hlawhtling ber pawl Mourinho hian December 2018-a Manchester United a chhuahsan hnuah club enkawl a nei leh tawh lo. 

Zidane hian La Liga match liah vawi hnih chiah a team a la chakpui a, Real Valladolid-in Bernabeu-ah an draw thei a, khualmualah Villarreal an inhnehtawkpui bawk.  Champions League-ah Paris Saint-Germain lakah 3-0 ngawtin an mualpho zui. 

Ballague chuan, "PSG hmachhawn turin a team kha ruahmanna a siampui miah lo. Tlarhnung kha hmuntinah a pawp a, a siamṭhat theih loh avangin coach a nihna ang chuan a hlawhchham a ni. "Pathianni zan dar 12:30-ah Sevilla an hmachhawn ang a, a hnuah Atletico Madrid an hmachhawn leh dawn bawk. Match li emaw match nga lo awm tur hi Zidane hma hun hril tur a ni ang," a ti. 

French football expert Julien Laurens chuan, "PSG lakah khan midfield-in vawi thum pawh ball an in pass thei lo. Kawng engkimah Real an hnufual," a ti a, Terreur chuan, " Marc Wilmots-a'n Belgium a enkawl tirh minti hre chhuak a, plan mumal awm lo inkhel a ni ṭhin," tiin Zidane a dim lo hle.