Greenwood-a'n United record a siam

Mason Greenwood chuan Manchester United tana Europe-a goal khung naupang ber record thar a siam. Ole Gunnar Solskjaer hote hian Ningani zan khan Europa League-a an match hmasa berah Astana 1-0 in an hneh a, group L inkhel dangah Partizan Belgrade leh AZ Alkmaar te 2-2 in an inhnehtawk.

Manchester United hi Pathianni zan dar 6:30-ah West Ham United nen London Stadium-ah an inkhel dawn a, Solskjaer chuan Hammers hmachhawn tura an inpeih tawh thu a sawi.

Norwegian manager Solskjaer chuan kum 20 tling lo player pathum Greenwood, Tahith Chong leh Angel Gomes te bul a ṭantir a, kum 2009 hnua Europe inelnaa teenager bul ṭantu tam leh ber ṭum a ni. Hei chauh hi a ni lo - player naupang dang Diogo Dalot (20), Axel Tuanzebe (21) leh Marcus Rashford (21) ten bul an ṭan. Portuguese wing back Dalot tih loh player panga hi United rawlthar chawimawina Jimmy Murphy Young Player of the Year dawng tawh vek an ni.

Inkhel bul ṭan player dang Sergio Romero, Phil Jones, Marcos Rojo, Fred leh Nemanja Matic te lah khelhna hun chang tam tawk lo vek an ni. Solskjaer-a'n risk a la huai a, Astana lakah point thum hlu tak a hlawh chhuak. Chutihrualin United rawltharte hriam tawk lohna a lang a, tawnhriat ngah zawkte pawh an khelh tlem avangin an bil a, inkhel thunun mah se minute 73-naah Greenwood hmanga goal an khung chauh avangin awm nuamin an awm lo.

Kum 46 mi Solskjaer-a'n Manchester United a enkawl ṭantirh aṭangin tum chiang tak a nei a, kum 17 mi Greenwood chhawr a duh avangin tawnhriat ngah zawk Romelu Lukaku leh Alexis Sanchez te a chhuahtir hial. United boss chuan, "Club-in thutlukna dik kan siam. Tun season-ah kan tan player pawimawh tak a ni dawn. Khelhna hun a la chang tam tawk lo a, minute erawh a ngah zel ang," tiin a sawi.

Greenwood hi pre season friendly-ah pawh chhawr tam ni a, Leeds United leh Inter Milan an khelh ṭumin goal a khung. Premier League-ah erawh match liah a khelhah goal a khung lo a, Solskjaer erawhin Astana an hmachhawn hma pawhin goal khung tur bik a nih zia hahipin an fak.

Old Trafford-ah United-in goal an khung theih lawk loh avangin an mangang a, minute 73-naah mi bik Greenwood rawn langin amah vengtu defender a bum hnuah goal ṭha tak a khung. United legend Clayton Blackmore chuan, "Engtin nge a ṭhan zel dawn chu kan hre lo a, hma erawh a sawn zel. Ka hmuh ve tawhah chuan a ke thiam loh lam pawha freekick leh penalty pet thei a ni," tiin a ke pahnih a hman thiam dan a inan chiah thu a sawi.

United hian match ngaah point riat hmuin palina dinhmun luah mah se an hmelma Liverpool erawh an la chak vek avangin point 15 an hmu tawh. Solskjaer-a hote hian nomawi ni loin season tawpa palinaah an lungawi a nih pawhin West Ham lakah point hloh a thiang tawh lo. Nikum khan London Stadium-ah Hammers hi 3-1 in an chak.

Solskjaer chuan, "West Ham nena kan inkhel tur atan kan inbuatsaih tawh a, Zirtawpniah kan awm hahdam anga Inrinni hian a tawp nan kan inpuahchah leh ang," tiin a sawi a, chutihrualin Astana nena khel ṭha Marcos Rojo tan pawh vei lamah khelhna hun a awm theih a rinawm.