China Open-ah Sindhu a chak lo

Badminton world champion ni lai PV Sindhu chu China Open last 16-ah a tla. India nula hian beiseina sang tak nen China pan mah se Ningani khan Pornpawee Chochuwong hneh loin a zinkawng a tawp.

Rio Olympic silver medalist Sindhu hi Thailand nula nen minute 58 zet an inkhelh hnuah 12-21, 21-13, 21-19 in a chak lo. China rama inelna neihah hian India chhuanvawr pakhat zawk Saina Nehwal chu hneh nei loin a lo tla tawh bawk.

Inkhel hmuhnawm takah Sindhu-i'n bul a ṭan fuh zawk a, 3-0 a hma a hruai hnuah 7-1 in a sang fal - game hmasa ber chu India nula chan a ni. Game hnihnaah Pornpawee zawkin 5-1 in hma a hruai ve thung a, hnung tawlh em em nei loin game hnuhnung pahnihah a chungnung zawk a ni.

Doubles specialist Satwiksairaj Rankireddy tan pawh ni duhawm lo a ni. Commonwealth Games champion hi men’s doubles leh mixed doubles last 16-ah a tla ve ve bawk. Men’s doubles-ah Satwik leh Chirag Shetty te ṭangdun chu Japanese pair Takeshi Kamura leh Keigo Sonoda te lakah minute 33 chhungin 19-21, 8-21 in a chak lo.

Satwik hi mixed doubles lamah a inlan bawk a, a ṭanpui Ashwini Ponanappa nen Yuki Kaneko leh Misaki Matsutomo te ṭangdun chuan 11-21, 21-16, 12-21 in an ngam lo.