Stamford Bridge a sen dawn nge a pawl dawn?

Liverpool-in Premier League champion an beisei a, match nga an khelh tawhah an la chak vek - Pathianni zan dar 9:00-ah Chelsea an lenchilh dawn a, tun season-a an point hloh hmasak ber tawng thei dinhmunah an ding. 

Chelsea erawh match nga an khelhah vawi hnih chiah an la chak a, vawi khat an tlawm a, vawi khat an khingpui an draw. Frank Lampard enkawl team hian 'champion' niloin a sang pali zinga tel an tum ang. Liverpool hian tuna an squad neih hmangin Champions League nomawi an chawi tawh a, Chelsea erawh indin thar mek an ni thung - hei tak hi an inthlauhna a ni. 

Mahse, UEFA Super Cup-ah Liverpool hian penalty hmangin Chelsea hi an hneh hram a, inchhuang thei an awm lo - Stamford Bridge-a an chak hnuhnun ber lah 2016 a ni tawh. 

Liverpool tan goalkeeper chhuanvawr Alisson chu hliam vangin a la inlan thei dawn lo a, mahse a awm loh hlana Adrian a chet ṭhat tho avangin Reds tan buaina tur a ni lo. 

Reds forward Divock Origi dinhmun sawi chian theih a la ni lo a, Klopp hian Roberto Firmino, Mohamed Salah leh Sadio Mane te tlarhmaah a rem leh mai a rinawm. Naby Keita-a'n training zawm mah se inkhel bul ṭan tur em chuan a la rintlak lo ang. Liverpool hi Napoli hneh lo hlim an ni a, player-te an chau ang tih a chiang - hei hi Chelsea tan hun remchang siamsaktu a ni thei. 

Chelsea hian Champions League-ah Valencia ngam lo ve tho mah se mahni muala khel an ni a, an zin chauh loh avangin Reds aiin insiam remna hun an ngah zawk. 

September 2016 hnuah Reds hi Stamford Bridge-ah an la chak leh lo a, hemi chung­changa an zawhna chu Klopp chuan, "An ṭha em alawm," tih zawngin a chhang!

Mahse, league-a team pahnih inhmachhawn hnuhnung pakuaah Chelsea hi vawi khat chiah an la chak - vawi nga an inhnehtawk a, vawi thum chu Liverpool hi a chak lamah an ṭang. Klopp chuan, "Chelsea-ah hian hnehna chang turin kan kal ang," a ti a, "Kan chak theih loh thu hi khawiah mah a inziak lo," tiin a sawi zui. 

German coach chuan Chelsea nena an inkhel tur chu team dang nen a hlutna a inan reng thu sawi nghalin, "Kum 2016-ah khan top six club kan hneh vek a, mahse hmun dangah buaina kan nei leh si," a ti. 

Chelsea tan winger Callum Hudson-Odoi chuan kum nga chhung atan contract thar a ziak a, kar khatah £120,000 hlawh turin inremna an ziak. 

January-a Bayern Munich pan hman ṭep forward-in Chelsea-a a hma hun a pawtsei hi Blues fans tan thu lawmawm a ni a, April-a a inhliam hnuah squad-a kir thei turin a dam leh tawh bawk. Blues hian hliam vangin Mason Mount chhawr thei dawn lo mah se N’Golo Kante leh Emerson  ten training an zawm leh tawh avangin Chelsea ngaih a ngam sawt ang. 

Hetihlai hian kum 21 mi Tammy Abraham chu Blues tlarhma innghahna tur a ni a, league-a goal sarih khung tawh striker hian, "Kan lawm lohnate Liverpool lakah kan leih baw thei ang," tiin Reds a vau lawk.