Jeremy che fuh tawk lo

Mizo rawlthar Jeremy Lalrinnunga chu World Weightlifting Championships-ah beisei angin a che fuh tawk lo a, nimin khan 67kg huangah inlanin Group B bikah 10-na dinhmun a luah.

Youth Olympic gold medalist hian a pumpuiah 296kg a chawi, clean & jerk 136kg leh snatch 163kg a ni. Jeremy-a inlanna huangah hian Chinese tlangval Feng Lyudong chu pakhatna a ni a, ani hian total-ah 333kg a chawi.

Olympic-a inlan thei turin qualifier atan a tlem berah inelna lian paruk tal hmachhawn a ngai, chumi hnuah ranking sang zual an inlan thei chauh ang. Jeremy hian kumin February thla khan EGAT's Cup International Weightlifting Championships-ah silver medal a lo la tawh.

Mahse, Asian Senior Weightlifting Championships-ah pakuana a ni a, Commonwealth Senior Weightlifting Championships-ah erawh a lang phak lo. Tun ṭumah a chet fuh tawk loh avang hian Olympic khel tur chuan hmabak a hautak tawh dawn.

Jeremy hi a kum a la naupang a, junior leh youth huanga la inlan thei chauh a ni. Olympic atan hian senior huangah teltir a ni a, atan inelna hi a la awlsam lo.