Mizoram hmaah Arunachal Pradesh

Santosh Trophy NE Zone Qualifying Round-ah Mizoram team chuan Pathianni tlai dar 3:30 hian match hmasa berah Arunachal Pradesh an hmachhawn dawn. Mizoram hi group A-ah a thlengtu Tripura, Assam leh Arunachal Pradesh te nen an awm ho a, team pakhatin final round an lut dawn.

Kum 2014 khan Mizoram hi Santosh Trophy an champion a, hemi hnu hian inelna vawi nga hmachhawn leh tawhin semifinal vawi thum lut leh tawh mah se final erawh an la lut leh lo. Tun ṭumah hian coach Lalremtluanga Renthlei-in Mizoram senior team hi a enkawl ang.

Mizoram hian Ningani zan khan Tripura an thleng a, nimin aṭangin training an nei chhunzawm nghal. Pathiannia Arunchal Pradesh an hmachhawn zawhah Remtluanga kaihhruai team hi September 24, Thawhlehni hian Tripura nen an inkhel ang a, an match hnuhnung berah  Assam nen September 26, Ninganiah an inkhel ang. 

Mizoram manager K. Lalenghluna chuan, "Kumin kumtir khan Mizoramin final round kan thleng lo a, football hruaitute leh ngainatute pawhin hrehawm kan ti hle. Tun ṭumah chuan final round thlen ngei kan inbeisei a, chumi tur chuan inpuahchahna pawh kan nei ṭha a ni," tiin Vanglaini a hrilh.

Kumin kumtir khan Mizoram hian Santosh Trophy qualifying round hi an thleng a, tun ṭuma inelna thlengtu Tripura hi 3-0 in hneh mah se Meghalaya laka 1-0 a an tlawm avangin final round an lut lo. AIFF chuan 2019-20 season-ah hian inelna neih hun an rawn sawn hma a, kum khatah inelna vawi hnih a awm dawn ta a ni.

9th March 2014    Champion : Mizoram 3 - 0 Railways

13th March 2015    Semifinal : Mizoram 1-1 (11-12P) Punjab

March 2016    Mizoramin final round group stage paltlang lo

23rd March 2017    Semifinal : Mizoram 0 - 0 (5-6 P) West Bengal 

30th March 2018    Semifinal : Mizoram 0 -1 Kerala

15th February 2019    Qualifying Round : Mizoram 0 - 1 Meghalaya