World Alzheimer's Day hman a ni
Alzheimer's & Related Disorders Society of India (ARDSI), Mizoram Chapter leh National Mental Health Programme (NMHP) chuan September 21, Inrinni khan Chanmari YMA Hall-ah World Alzheimer's Day an hmang a, Health minister Dr R Lalthangliana'n a hmanpui.
Dr R Lalthangliana chuan, khawvel hmasawnna a ṭhang zel a, natna awm reng ṭhin, hriat chian loh vanga enkawl ngaihna hriat loh leh hmelhriat lohte chu tunah chuan a nihna tak hriat chian theih a ni tawh a, awmze nei zawkin inenkawlna a awm thei ta tih a sawi a, "Natna chi hrang hrang vei zingah thluak sáwng natna Alzheimer's veitute hi enkawl a hautak em em a, duat leh hmangaih taka dawhthei taka enkawl an ngai ṭhin. An natna hmuhchhuah leh enkawl dan tur inzirtirna hi uar lehzuala neih a ṭul a ni," a ti.
Alzheimer's chu mi tam takin an la hriatthiam loh avangin natna dang emaw tih vanga buaina namênlo a awm thei tih sawiin, "Mizoramah Mental Health Hospital ṭha tak a hranpaa kan neih a ṭul a, hetiang hospital din dan tur hi bengsika kan ngaihtuah a ngai a ni," a ti a; ARDSI, Mizoram Chapter hmalakna leh Alzheimer's natna veitute enkawl kawnga hmalakna ṭanpuina atan Rs. 1,00,000 a thawh tur thu a puang.
World Alzheimer's Day puala inkhawmah hian president Vanneihtluanga pawhin thu a sawi a; Aizawl West College, Hrangbana College, Pachhunga University College, Mizoram College of Nursing, Mizoram University (Dept of Clinical Psychology) leh Mizoram University (Psychology department) zirlaite an tel.
ARDSI hi India rama Alzheimer's leh an anpui natna ngaihventu pawl lian zawkte nena inthlunzawm a ni a, September 21, 2015 khan Aizawlah ARDSI Mizoram Chapter din a ni.