Granada mualah Barca an mualpho

Spanish La Liga kai thar Granada chuan champion lai Barcelona chu 2-0 in an ngam a, table chung berah awmin hmahruaitu an ni!

Granada tan Ramon Azeez leh Alvaro Vadillo (penalty) te chuan goal khat ve ve an khung a,  Barca-in second half-ah Lionel Messi an luhtir chungin a chhanletna tur an nei lo. Match nga an khelhah Barca hi vawi hnih chiah an la chak avangin table lama an awmna en tur chuan a hnuai lam thlir a ngai a, pasarihna dinhmun an luah mek. 

Nizana Real Sociedad inkhel result a zirin Barca hi hei aia hniamah pawh la awm leh thei an ni a, hmabak a êng lo hle. 

Beisei loh 

Barcelona manager Ernesto Valverde-a'n Champions League-a vanneih thlak taka Borussia Dortmund (0-0) inhnehtawkpuitu team aṭangin player pali a thlak danglam. 

Lionel Messi chu bench-ah dah chhunzawm a ni a, nipui transfer-a lakluh Junior Firpo chu Jordi Alba inhliam zarah a vawi khat nan inkhel bul ṭantir a ni bawk. Mahse, minute khat leh second ngana lekah Firpo a chesual nghal a, a chetsual zarzoin Ramon Azeez chuan goal hmahruai a rawn khung. 

Granada-in vanneih vanga goal hmahruai khung an ni lo tih an pholang chhunzawm a, Manchester City aṭanga loan-a an hawh Yangel Herrera chuan chance duhawm tak a hlah. 

Catalan club an beidawng duh lo. First half hun pek belhah Luis Suarez chuan chance duhawm a nei a, mahse Uruguayan striker shot hi goal line aṭangin an pet chhuak hman. 

Valverde-a'n goal an mamawh tih hriain Messi leh Ansu Fati chu second half ṭantirah a luhtir a, mahse player pahnih hian ball ṭha an dawng chungin goal an khung thei chuang  lo. Granada bawkin goal an khung ta zawk a, bench aṭanga luhtir Barca midfielder Arturo Vidal chuan handball vangin penalty a chawi chu Alvaro Vadillo chuan harsatna nei loin goal-ah a chantir. 

Barca-in an goal hnihna an chhuah hnuah an tho leh tawh lo a, goal khung beiseina a bo. Barca an tlawm a, an mualpho. 

1994-95 khan Johan Cruyff enkawlna hnuaiah Barcelona hian an match hmasa panga aṭangin point sarih chiah an nei a, hemi hnuah tun season hi La Liga-a bul an ṭan chhiat ber a ni. 

Tun hnai season nga chhunga vawi li league champion ni thei Barcelona hi nikum khan inelna neih chhung zawngin match thumah chiah an tlawm a, tun season-ah erawh match hnih an tlawm fel der tawh. 1994-95 hnua a vawi khat nan khualmuala an league match hmasa pathumah an chak zo lo a, La Liga-a khualmuala an league match hnuhnung pasariha parukah goal an khung thei lo. 

Inrinni zan inkhelah pawh vawi riat chiah shot an nei a, target-a shot an neih chhun chu Messi-a'n vawi khat a shot zawng a ni. Pound maktaduai 107 man Antoine Griezmann chuan Barca tan khualmuala match li a khelh tawhah target-ah shot a la nei miah lo bawk!

Barcelona coach Ernesto Valverde ban duhna thawm a ri ring ta viau a, Spanish manager hian Nou Camp-ah engtia rei nge hun a hman dawn - hriat a har ta hle. 

Hetihruala Barca vanneihna chu an elpui ber Atletico Madrid leh Real Madrid ten beisei an phak bik lo hi a ni a, an insiamṭhat hma chuan champion an la beisei ngam. Atletico Madrid chuan Inrinni zan vek hian goal khung loin Celta Vigo an draw a, Barca aiin point hnih lekin an la sang - um phak theih an la ni. 

Nizanah Real Madrid an inlan a, chak pawh ni se point li bakin Barca an tlansan dawn lo. La Liga a la ngaihnawm chho dawn chauh.