Coronavirus vangin Serie A an khel thei lo!

China rama hri leng 'coronavirus' chuan khawvel pumah nghawng a nei lian chho zel. Inrinni zan khan Italian prime minister Giuseppe Conte chuan Veneto leh Lombardy chhehvela infiamna neih tur 

ṭhahnem tak chu coronavirus vangin ṭhulh rih a nih thu a puang.

Football bikah league hniam leh a sang zawng zawng nen match 42 chu a hun sawn a ngai - Serie A champion tum Inter Milan leh Sampdoria inkhel tur pawh sawn zingah hian a tel.

Italy PM Conte chuan, "Minister of Sport Vincenzo Spadafora chuan Inrinni zana Veneto leh Lombardy huam chhung leh a chhehvela infiamma chi hrang hrang chu tih loh a duh," tiin a sawi. Sports minister hian coronavirus chuan mipui an him theih nan sorkarin theihtawpa hma a lak thu a sawi bawk.

Nikum aṭanga China rama an buaipui tawh coronavirus hi a hmingah 'Covid-19' tih a ni tawh, BBC Sports-in a tarlan dan chuan nimin tlai thleng khan China bikah mi 75,567 zetin an vei tawh, an zinga 2,239 chu an thi.

China ram pawnah pawh hri hi a darh zel, ram hrang hrang 26-ah a vei hmuh chhuah an ni tawh a, belhkhawmin mi 1,200 an tling tawh - World Health Organization tarlan danin mi pariat an thi.

Europe-ah hri leng hi a lut tawh a, Italy ramah hian mi 79 zetin an vei tih hmuhchhuah a ni, an zinga pahnih chu thiin, midang pawh an dinhmun a ṭha lo hle - European ram dang zawng aiin Italy-ah hian vei an tam.

Italy ram chhungah pawh hian Lombardy (mi 47), Veneto (17), Emilia-Romagna (2), Lazio (Chinese khualzin pahnih) leh Piedmont (1) te chu hriatchian an ni; darh zel thei dinhmunah a din mek avangin invenna lam an kalpui a ngai.

Inter Milan-in league match an khel thei rih lo a, manager Antonio Conte naute hi February 27, Ningani zanah Ludogoretes nen Europa League last 32 second leg khel zui tur an ni, he inkhel tur pawh hi a chiang ta lo.

Italian club hlun hian Serie A match an khelh tur sawn a nih thu hi an puang a, a hnu lama an match khelh turah erawh hriat lawk an nei bik lo. Serie A bakah European football thlengin nghawng a nei chho thei dawn niin a lang ta.

Europe-a football thuneitu sang UEFA chuan nimin tlai thleng kha chuan thuchhuah an la siam lo. Inter hian San Siro-ah match an khel thei lo a nih chuan khelmual dang an hmang emaw, an inkhelh hun sawnsak leh emaw a ngai dawn a ni.

 Football 

Chinese club - Guangzhou Evergrande, Shanghai Shenhua leh Shanghai SIPG te inlanna tur Asian Champions League chu April leh May atan sawn a ni tawh.

Shanghai Shenhua leh Shanghai SIPG te hi Perth Glory leh Sydney FC a inkhel tur an ni. Mahse, Australia sorkar lamin Chinese mikhual neih an duh rih lo.

Team pali inelna tur Women's Olympic qualifying tournament-ah China, Australia, Taiwan leh Thailand te an inel dawn a, tournament hi Wuhan-a khelh tur ni mah se AFC chuan Australia-ah a sawn.

Chinese Football Association chuan inelna hrang hranga match zawng zawng a ti tawp lailawk. 

 Athletics

World Athletics Indoor Championships chu March 13-15 chhung hian China khaw chhak lama khawpui pakhat Nanjing-ah neih tur a ni, he inelna pawh hi nakkum atan an sawn - World Athletics chuan a hun tur a la ti fel lo.

Asian Athletics Association chuan February 12-13 chhunga Hangzhou-a neih tur Indoor Championships chu an ṭhulh.

 Tennis

International Tennis Federation chuan a tirah Fed Cup Asia/Oceania Group I chu Dongguan a neih turin a ti a, a hnuah Nur-Sultan, Kazakhstan lamah a sawn.

Mahse, China, Taiwan, Indonesia, South Korea leh Uzbekistan te inelna tur hi Kazakhstan chuan a thleng duh lo a, ram dang Dubai-ah sawn a ni; China chu an inhnuhdawh phah hial.

 Motorsport

Formula 1 thuneitu chuan April 19-a Shanghai khawpuia a neih tur Chinese Grand Prix chu a hun an sawn, an neih hun tur erawh tih chian a la ni lo. Ram dang nena motorsports an neih tur dang pawh kumin tir lama neih tur ho chu neih theih a ni dawn lo.

 Boxing

International Olympic Committee chuan Asia leh Oceania telna Olympic Boxing Qualifier neih tur pawh Wuhan aṭangin Jordan-ah an sawn, inelna hi March 3-11 chhunga neih tur a ni ang.

 Basketball

February 6-9 khan Tokyo Olympics qualifiers chu Foshan-a neih tur ni mah se Belgrade, Serbia-ah sawn a nih thu International Basketball Federation chuan an sawi. China leh Malaysia ten February 24-a FIBA Asia Cup 2021 qualifying match an khelh tur pawh a hun sawn hlat a ni.

 Badminton

Hainan thliarkara neih tur China Masters tournament chu player inlan tur an inhnuhdawh nasat em avangin inelna neih hun tur February 25 aṭanga March 1 chhung chuan an nei thei 

dawn lo. 

Badminton World Federation chuan an inelna lian leh ngaihhlut Badminton Asia Championships chu April 21-26 chhung hian Wuhan-ah neih theih an la beisei fan a, mahse hei pawh hi a chiang ta lo.

 Hockey

China leh Australia ten March 14-15 chhunga Changzhou-a Hockey Pro League an khelh tur chu ṭhulh a ni. International Hockey Federation (FIH) chuan China leh Belgium ten match an neih tur pawh a hun a lo sawn tawh.

 Tokyo 2020?

Infiamna khawmpui lian Tokyo Olympic chu July 24 aṭangin neih a ni dawn, tunlai hian infiamna peng hrang hrang chuan qualifier an khel mek. Mahse, hri leng avang hian qualifier match khelh theih loh a tam a, a hun sawn a awm nual bawk.

Japan khawpui Tokyo-ah coronavirus hi tun dinhmunah a kai mi 219 hmuh chhuah an ni tawh, thuneitu sang International Olympic Committee (IOC) chun harsatna hrang hrang thleng thei an thlir reng a, tun thleng chuan Olympic hun sawn emaw ṭhulh tum emaw sawi an la nei lo.

Tokyo Organising Committee chief executive officer Toshiro Muto chuan, "Hrileng hi kan thunun theih bak a ni a, infiammi leh mipui harsatna a thlen palh ang tih kan hlau takzet. Harsatna lian zawk a thlen loh nan theihtawpa hmalak mek zek a ni," a ti.