I League hma hun a thim

All India Football Federation (AIFF) leh Asian Football Confederation (AFC) thuneitute chu kar hmasa khan Mumbai khawpuiah an inkawm a, Indian Super League leh I League kal zel dan tur chungchang an sawi ho. AFC aiawh hian general secretary Dato Windsor chu India ramah a rawn zin a, AIFF president Praful Patel leh general secretary Kushal Das-te nen an inkawm a ni. 

AIFF executive committee chuan ISL hi India rama league sang ber ni turin a lo pawm tawh a, inelnaa champion chuan AFC Champions League an khel ang - mahse hei hi AFC chuan an pawm ve leh phawt a ngai. Kushal Das chuan, "AIFF chuan league sang ber ni tura ISL kan duh thu kan thlen a, AFC hian an member-te rawtna chu a pawm tlangpui a ni," tiin a sawi. 

Mahse, AIFF buaina pakhat chu AFC Cup khel tura I League champion tih lai hi a ni. AFC Club Competitions 2017-2020 (Article 12.1)-a a lan dan chuan national league champion-in Champions League khelh tur a ni a, national knock-out cup champion tan AFC Cup khelh tur a ni thung. 

I League kalphungah table chung bera awm chu champion an ni ṭhin a, AFC dan anga kal dawn chuan ISL angin a sang paliin semifinal an khelh a ngai ang - hei tak hi engtin nge hma an lak dawn, hriat theih a la ni lo. India aiawh club hian preliminary round aṭangin Champions League pawh hi an khel ṭhin a, AIFF chuan AFC hnenah hian group stage aṭanga Indian club-te khelhtir turin ngenna an thlen bawk.